Macahu tellem cahu, Ṛebbi ad tt-iselhu, ad tt-iɣzif anect n usaru. Tella yiwet n tmeṭṭut, tesεa mmi-s d awḥid. Tettagad fell-as nezzeh, deg wakken argaz-is di lɣerba i yettidir, tṛebba-t s lebɣi neɣ s ttnefcic: ayen i d-yeḍleb, ad d-yaweḍ, ama yewjed, ama ad d-yettwarḍel. D yir tannumi, d yir azekka. Yuɣal armi i d-yesnulfa yir ṭbiεa, ad as-yini a yemma efk-yi-d kra ma ulac ad ḍeggreɣ iman-iw si teεrict. Ma yella tugi, ad yali ɣer teεrict, ad yesteεmel a-t-an ad d-iḍegger iman-is. Yemma-s, tettagad i ixeddem, ad yemmet, ad tendem meṛṛa di tudert-is teqqar-as: “D ayen, d ayen a mmi. Ers-d si teεrict, ayen tebɣiḍ ad ak-txedmeɣ”. Truḥ tudert n uqcic di yir tannumi. Yewweḍ-d urgaz-is seg yinig, yefreḥ s tmeṭṭut-is d mmi-s. Yiwet n tikkelt, yenṭeq ɣer mmi-s: “Ammi, yya-d, ad teččeḍ imensi”. Mmi-s: “Ur tetteɣ ara seksu, bɣiɣ tamellalt”. Yemma-s: “A mmi, tamellalt ur tewjid ara, d iḍ ayagi, ečč ayen yellan, ṣṣbeḥ ad ak-d-nawi acu i tebɣiḍ”. Aqcic: “Welleh, ar ad d-tefkeḍ tamellalt neɣ ad aliɣ ɣer teεrict”. Baba-s: “Acu ara txedmeḍ di taεrict?”. Yemma-s: “Ad d-iḍeger iman-is”. Yezεef urgaz mi yesla imeslayen-agi uzligen, yenna-as: “Ali ɣer teεrict tura. Lemmer ur tettḍeggireḍ ara iman-ik, d nekk ara ak-id-iḍeggren”. Iwala uqcic tidet tuqriḥt, yuɣal yugi ad yali, yeqqaṛ-as: “Dayen a baba, ad ččeɣ ayen yellan”. Baba-s: “ Welleh lemmer ur ẓriɣ ara belli d yemma-k i ak-iṛebban akka, ar d ad ak-ssaliɣ ɣer lqeṛmud, mačči kan ɣer teεrict syin ara ak-id ḍeggreɣ s ufus-iw, acku lehdur-agi i tlemdeḍ mačči n yirgazen, n yir laṣel, n at ttnefxa ur nesεi azal”. Seg wass-nni, yuɣal uqcic d mmi-s n wass-is. Yeẓra d acu d ddunit. Ihi, timmad n umdan tettuwrat ama seg yidammen-nneɣ si tmetti deg nettidir. Win iḥemmelen tarwa-s, yefka-s tussna d ttṛebga tumεint d llsas.
Yahia Yanes