Deg tdiwennit-a, yemmeslay-d Djamel Hoceini ɣef wakud-is i yefreq gar uẓawan akked teklut. Yenna-d amek i d-ttfeggiḍen yiḥulfan-is mi ara d-yelhu yid-sen.
Aɣmis n yimaziɣen : amek i d-tufiḍ iman-ik deg uḥric-agi n teklut ?
Djamel Hoceini : xas akken xeddmenɣ aẓawan, lameɛna seg zik mmaleɣ ɣer tẓuri icebḥen (Taklut). Ula deg tesdawit, xeddmeɣ asuneɣ n wudmawen n yinelmaden. Akka, yiwet yiwet armi d asmi i d-mmlaleɣ daɣen iselmaden n teklut akked uẓawan deg Uxxam n yidles Mulud Mɛemmeri n Tizi Uzzu, anda i ikemmel lebɣi-w deg uḥric-agi n tẓuri s umata. Syin, kecmeɣ d aselmad n uẓawan deg tesnawit Amirouche n Tizi Uzzu.
Deg useggas n 2015, tekcem-d yiwet n tselmadt n usuneɣ ɣer tesnawit-agi, mi walaɣ amek txeddem, dɣa terra-yi-d kullec ɣer deffir ‘’uɣaleɣ-d s wadda i ccufat’’. Asmi twala ayen xeddmeɣ, yeɛǧeb-as, dɣa nebda acebbeḥ n uɣerbaz-nni. Nesuneɣ iɣerban-is akked yimekwan-nniḍen daxel n tesnawit. Ayen iɛeǧǧben nezzeh imawlan akked yixeddamen s umata.
Syin i yebda umecwar-ik ihi s wudem unṣib ?
Akken ih. Tuɣal-iyi-d tebɣest, umneɣ s wayen xeddmeɣ. Ihi, bdiɣ s tfelwiyin timecṭaḥ imi axxam-iw meẓẓi. Bdiɣ s Aquarelle (asuneɣ s waman), yal ass xeddmeɣ yiwen neɣ sin. Xdem, terreḍ d rrif armi teččur teɣmert n uxxam. Syin, ttunefkent-iyi-id tegnatin, seg useggas n 2017, i wakken ad ttekkiɣ deg tfaskiwin neɣ deg rreḥbat n tẓuri icebḥen. Rreḥba tameqqran i deg ḥeḍreɣ, d tajmilt i as-rran i unaẓur Denis Martinez.
Dinna, ḥulfaɣ s uswir n wayen xeddmeɣ imi aṭas n yinaẓuren i as-yefkan azal meqqren u mudden-iyi-d tabɣest i nekk s timmad-iw i wakken ad kemmeln deg ubrid-a. Dɣa akken i xedmeɣ, kemmleɣ deg umecwar-iw, ttruḥuɣ ɣer tfaskiwin i yettilin berra n tmurt n leqbayel. Ihi, ass-a, yewweḍ-d anda i xedmeɣ timsikent n tfelwiyin-iw deg Uxxam n yidles Mulud Mɛemmeri. Dɣa, d tagnit anda ara snemmreɣ wid ixeddmen akk deg uxxam-a ɣef uqerru-nsen anemhal-is akked tnemhalt n yidles n lwilaya n Tizi Uzzu i yi-yessebɣasen yal tikkelt mi ara iliɣ ɣur-sen.
Awal ma tebɣiḍ ɣef temsikent-agi-inek, dɣa…
Tella-d temsikent-agi ɣef teɣzi n ddurt : seg 25 armi d 31 deg yennayer 2020. Tewwiɣ-d ɣef tlata n yisental : Tamuɣli deg wayen ttwaliɣ, meḥsub sunɣeɣ tugna yellan, acu kan akken i tt-walaɣ nekk. Ffkiɣ-as ticraḍ-iw. Amedya, nekk deg uxxam aqdim, tekkseɣ ayen yesseḥzanen, ttbeddileɣ-t s wayen yessefraḥen. Tugna, tettɣimi d nettat, acu llant tecraḍ-iw, tella tnalit-iw.
Ferqeɣ timsikent ɣef tlata n yiḥricen : Amezwaru, d imekwan iqdimen n temdint n Tizi Uzzu, azal n ɛecra n yimekwan mechuren. Fkiɣ-asen tamuɣli tajḍidt, d icebḥanen, d izeddganen ; wis sin d axxam n leqbayel neɣ tudrin. D anekcum ɣer din, am wakken d inebgi. Anekcum n taddart, iseqfan-is. D awali s umata n taddart ; tis tlata d agama akked twennaḍt. Acu yesddukklen yakk leqdic-a d ticraḍ-iw. D aseqdec n Aquarelle (asuneɣ s waman). Taẓuri-agi xeddmeɣ nekk, teqqreb ɣer tilawt. Tikwal ad as-tiniḍ d tawleft s timmad-is.
Ahat, llant ula d ticraḍ n uẓawan deg leqdic-agi-inek ?
Ad ilint kan, yal aḥric n tẓuri, yesɛa assaɣ akked gma-s. Ula deg temsikent-a, cebbḥeɣ-tt-id s uẓawan. Skelseɣ-d kra n uẓawan i iteddun ɣef teɣzi n wass akked tfelwiyin, sellen-as wid i d-irezzun ɣer temsikent-iw. Seg tama n wassaɣ gar uẓawan akked usuneɣ, ad naf ttemcabin : ttergigin yimesla akken ttergigin yiniten. Acu kan, yal amdan uɣur yemmal.
Wa yettwali mliḥ, yettwali tiɣawsiwin ur ttwalin ara wiyaḍ. Wa isell mliḥ, isell i yimesla iwumi ur sellen ara wiyaḍ. Isell i ugama. Nekk ihi, ttnadiɣ ad kkseɣ lmil gar yimesla akked yiniten. Ad ten-sddukkleɣ lwaḥid. S unamek-nniḍen : tteɛraḍeɣ ad sunɣeɣ imesla u ad cnuɣ initen. Mi ara tturareɣ aẓawan, ttwaliɣ tugniwin deg-s, tteffɣent-d weḥd-sent. Zemreɣ ad d-iniɣ d akken kif kif iḥulfan n uẓawan akked wid n teklut.
Ad d-tili ahat temsikent-ik deg tmura tebbarṛaniyin sya d afella ?
Ttunecdaɣ-d ɣer tmur n l’Indonésie, ilaq ad ruḥeɣ deg waggur n yennayer-agi iɛeddan, acu kan yella-d laɛḍil. Dɣa deggren-t alamma d aggur n meɣres deg tmurt n Maṣer.
Awal-ik,n taggara …
Di tazwara, ilaq ad fken azal i tẓuri deg tmurt-nneɣ. Ilaq ad tt-yelmed uqcic s wudem igerrzen deg uɣerbaz amenzu i wakken ad tettwakkes yir tmuɣli ɣef tẓuri, acku aṭas i yeqqnen aẓawan ɣer ccḍeḥ kan. Taẓuri, d ttrebga, d idles. Acu kan, ilaq wayen yelhan mačči kan akka d menwala.
Yesteqsa-t Hocine Moula