Newwi-d awal d Mass Bouzid ɣef tmeslayt akked wansay yennayer. Ula d netta, yella daɣen d inebgi n tddukkla Numidya deg Wehran.
Aɣmis n yimaziɣen : Anda tedda tmeslayt deg tama-agi n Nnɛama ?
Mustapha Bouzid : Ɣur-neɣ, deg yiɣrem n Ɛesla, ttmeslayen akk tamaziɣt, s umeẓyan s uwessar (imeqqranen). Ma deg ugezdu n Nnɛama, dinna nezmer ad d-nini tenger ɣer tsutwin n wass-a. Mazal-itt kan ɣer yiwessaren).
Amek tesfugulem yennayer ɣur-wen ?
Ttheggin Yimaziɣen n Ɛesla sin yimensiwen n yennayer : Amensi n Hajuja d umensi n yixf n useggas. Ihi, ass n 12 deg waggur (janvier), ttgen amensi qqaren-as Hajuja. Ad ffɣen warrac imeẓyanen n uɣrem n Ɛesla ɣer tadliwin (izniqen) i wakken ad d-jemɛen iɣenba (isufar) n yimensi, am yirden, ibawen…atg. Ad leḥḥun, ad cennun i wakken ad asen-d-slent temɣarin, qqaren : ‘’A Nanna (Jida) Hayyu, uci-d tinset-inu. Aqedduḥ-inu, yerreẓ, ucent-aneɣ sebɛa-nneɣ’’. Ma deg yimensi n yixef n useggas, senfalent temɣarin inyen, smunsiwent ilemsi (lkanun), mmalent tinufas (timucuha). Ṭṭeggirent daɣen ciṭ n tisent (lmelḥ) ɣer lkanun, qqaren-as ‘’amensi n yilemsi’’.
Aql-ik tettmeslayeḍ taqbaylit, amek i d-yella waya ?
D taqbaylit i yi-yeǧǧan ad issineɣ ad urziɣ (ad nadiɣ) ɣef tmaziɣt d yidles amaziɣ. S yimussnawen n teqbaylit am Dda Lmulud At Mɛemmer d inaẓuren iqbayliyen am Lwennas Meɛtub, Ayt Mengellat d wiyaḍ i tt-sneɣ. Taqbaylit, d tala, nettagem-d seg-s tussna tamaziɣt.
Yesteqsa-t H. M.