Di lawan ideg ttnaɣen di Merruk yimeɣnasen akken ad tesṭeɛref tgelda n Muḥemmed wis 6 s Yennayer d ass n lficṭa taɣelnawt, tessuffeɣ-d ussana kan Tmurt n Tunes kraḍ n yiɣeḍmen (Timbres) ɣef yibabaten (Papes) iqdimen n Ruma i yesɛan lasel d amaziɣ. Ibabaten-a i yettwassnen ayendin, mačči ala deg umezruy n Tunes, d Victor amenzu, Gélase amenzu d Miltiade. Akken ma llan ruḥen si Tmazɣa, ɛeddan-d d iqerra seg Tmesgida n Ruma, rnu wwin-d ayendin d rryuy d tektiwin iɣef mazal yella umeslay ar tura.
Miltiade yewweḍ i teglizt n Ruma mi tella deg yir liḥala, armi bḍan ula d ineflasen garasen, abeɛda akked tmesgida n Tefriqt. Yella seg wid iqeblen akk tisraṭ d tlelli n usemres n ddin. Gar tigawin i iga daɣen, d tikci n uɣrum baṭṭel i yiẓawaliyen armi ula d Saint Augustin isemma-as « Ababat n uɣref amasiḥ». Amedya n Victor amenzu, i yeddren di tallit n Tertullien, yella d ababat di taggara n tasut tis snat, am wakken i yesseqdec aṭas tutlayt talatinit di tsekla tamasiḥt. Yella yettwassen s terẓen-is d usuddes i tmesgidiwin i yella yeddebbir, ma nga aserwes akked tid n ccerq.
Ma yella d ababat Gélase, neɣ Ɣilas s wudem idetti, yettwassnen ɣef umennuɣ i d-yewwi akken ad tqerreɛ tsertit ɣef tmesgidiwin. Yura ula d netta ddeqs n yiḍrisen, di yiwet n tallit n leḥris d temhersiwin i d-yewwin ula d aɣelluy n Ruma deg useggas n 410. Si tama n yimeɣnasen n Timmuzɣa d wid n yizerfan n umdan, aṭas i iwalan ccɣel-a di Tunes d ayen yelhan ulamma tamaziɣt mazal ur tesɛi amḍiq s wudem unsib, d ayen i yeǧǧan amennuɣ ɣef tmagit sɣur Yimaziɣen n Tunes yeqqim-as-d umecwar.
« Mačči d taɣawsa meqqren i lfayda n laṣel amaziɣ i texdem tmurt n Tunes. Maca mi ara nwali amezruy n yibabaten-a d wamek llan qqnen i ddin n tmasiḥt, nezmer ad d-nini d ayen igerrzen ula i tugdut d uqader n tlelliwin », i d-yenna yiwen n umeɣnas.
M. K.