Accueil Tamazight Ttwajerdent kan 63 n tudrin !

Timsizzelt Aïssat Rabah n tezdeg - Mazal yettkemmil ujerred

Ttwajerdent kan 63 n tudrin !

73
- PUBLICITÉ -

Wissen i wacu tesseɣzef teseqqamut yettwakelfen s twennaḍt d tezdeg akked tdawsa n useqqamu aɣelnaw n lwilaya n Tizi Uzzu azemz aneggaru n usersi n zzmam n uttekki deg temsizzelt-agi i yetturaǧun ad yili ass n 15 yulyu neɣ ɛad 20 yulyu 2019 ?

- PUBLICITÉ -

I usmekti tallit tamezwarut n ujerred n tudrin yebɣan ad ttekkint deg tezrigt tis sebɛa n temsizzelt n tezdeg Aïssat Rabah, tella-d seg 10 meɣres 2019 armi d 30 yebrir 2019. Deg taggara n waggur n yebrir, ala 15 n tuddar i ijerden iman-nsen, sɣezfen-as i tallit-agi n ujerred, i yetturaǧun ad tessali ass n 15 yulyu neɣ ɛad 20 yulyu i d-iteddun.

Alaḥsab n yisallen i d aɣ-yewwḍen seg teseqqamut-agi, di taggara n waggur-agi n yunyu iɛeddan, ala 63 n tudrin i yettwajerden deg tezrigt-agi tis sebɛa. Yenqqes s waṭas umḍan-agi ɣef useggas iɛeddan, i yewwḍen ɣer 102 n tuddar, dayen uɣur ssaramen yiɛeggalen n teseqqamut-agi ad t-awḍen s useɣsef n tallit n ujerred.

Ahat d amherkel-agi aɣerfan i d-yellan deffir n waya. Imi taseqqamut yettwakelfen s twennaḍt d tezdeg akked tdawsa deg Useqqamu-a, tessashel merra ttawilat i tuddar yenwan ad ttekkint, ilaq fell-asent ad sersent zzmamat-nsent ɣer Useqqamu Aɣerfan n Lwilaya ideg tella kan tuttra n uttekki akked taččart n tferkit n uttekki.

Mačči am tezrigin iɛeddan, imi tikkelt-agi, tudrin yebɣan ad tekkint deg tezrigt n useggas-a ur ḥwaǧent ara ttbut n tilin (agréments) n tseqquma n tuddar, xas ulamma llant tudrin ur neksib ara tiseqquma n tuddar, zemrent tddukkiliwin n twennaḍt ad ɛemrent tiferkit-nni n uttekki.

Amaynut d uktazal n tezrigt-agi tis ṣat

Ma ɣef umaynut n tezrigt-agi tamaynut, yetturaǧu ad ttwaferqen 10 n warrazen ɣef mrawet n tuddar ara d-yufraren. Ala xemsa-nni n tuddar timezwura n tezrigt iɛeddan, i izemren ad ttekkint deg tedwilt-agi tis 7, ma d tuddar yewwin arraz wis 6, wis 7, wis 8 d wis 9 akked wis 10 tezrigt iɛeddan, ur zmirent ad ttekkint deg tezrigt-agi. Ad yili diɣ, usewseɛ n teseqqamut n uktazal d usenqeḍ n temsizzelt, imi yal tanmehla tadigant ad d-tefk imgenses-ines, yerna ad yettekki uḥric n tgemmi deg usenqeḍ.

Am wakken daɣen, ara d-slalen timḥezwert “Best off” n tezdeg, ara d-yilin gar 5 n tuddar i d-yufraren deg semmus n tezrigin timenza, si tmezwarut-nni n 2006 armi uqbel taneggarut-agi, tinna n 2017. Ma d iswi-ines d asebɣes n ukemmel n usizdeg n tuddar-agi, ma d tadrimt yettuɛegnen i waya mazal ur d-iban ara wazal-is. Rnu ɣer tmerna n 05% deg tedrimt i yettak Useqqamu Aɣelnaw n Lwilaya i tɣiwant ideg ara d-tifrir taddart tamenzwarut, imi yewweḍ watug-agi ar 25% mačči 20% am zik. Ma si tama n tfelwit n uktazal, ad d-yili usenqeḍ ɣef 112 tenqiḍin.

25 tneqqiḍin rzant aseddu n yiḍuman d wammus, ma d afran iwatan n yiḍuman ɣur-s 10 n tneqqiḍin. Aɛiwed n usexdem-nsen yesɛa 10 n tneqqiḍin, xemsa-nniḍen (5) ɣef tarrayt n ujmeɛ n yiḍuman. Imeḍqan uzyizen (publique), yecban tajmaɛt, imekwan n tizegzewt… atg ɣef 15 tneqiḍin mačči 20 am useggas iɛeddan, ula d iberdan n taddart ad ttwasneqḍen kan ɣef 20 n tezmilin mačči ɣef 25 am yilindi. Ma d imeḍqan n yidles d tmussni akked yisebdaden ɣef 12 tneqiḍin, areqqeɛ d uẓeggem ɣef 10 tneqiḍin, ma d xemsa-nni i d-yeqqimen i usnerni n taddart (aménagement).

Ɣer taggara maḍi, ad d-nesmekti belli tazrigt n useggas yezrin d taddart n Azemmour Ou Meriem i yewwin arraz amezwaru, ma d tinna uqbel-is d taddart n Tiferdoud i tt-yewwin d tamezwarut deg 2017.

Ghani Amazigh

- PUBLICITÉ -