Tineggura-a, anida tezzi tiṭ-ik ama deg yiberdan neɣ deg yimukan-nniḍen, ala tiqerɛatin d tebwaḍin n uplastik ara d-temlileḍ. Ulac tardast deg wakal n tmurt, ur tḥuza ara taluft-agi n yiḍuman n uplastik. Win iwumi tenniḍ, ad ak-yini : « Mačči d nekk ara d-iqeɛden tamurt ! ». Yal wa yettara-d ṭṭlam ɣef wayeḍ ; imezdaɣ qqaren-d d tiɣiwanin ur nxeddem ara axeddim-nsent, nutenti si tama-nsent, ur sawḍent ara ɣer lebɣi-nsent, yerna seḍlament imezdaɣ. Ma d tiddukliwin i iqedcen deg uḥric n twennaḍt, ula d nutenti sḥasfent ɣef liḥala n twennaḍt di tmurt, xeddment ahat nnig tezmert-nsent. Ula d asmi i yuɣalen yiḍuman d idrimen, ur cliɛen ara yimdanen, imi d tidet d idrimen-nsen i ṭeggiren mačči d iḍuman-nsen !
Mbeɛd mi d-yessawel uɣlif n twennaḍt ɣer tḥawact n yiḍuman deg wakal aɣelnaw, tettwalqeḍ-d tnecta (tasmekta) n 474,38 n yiṭunen yiḍuman n uplastik. D tigawt taɣelnawt iwumi semman « Aggur War Aplastik ». Tebda, ass n 21 cutember yezrin, ad tkemmel alamma d ass-a n, 21 tuber 2019. Ad d-yili uḍfar n tigawt-a taɣelnawt, sɣur teseqqamut n uḍfar d uktazel, yetabaɛen ɣer uɣlif n twennaḍt. Am wakken, i ssawḍen ad d-suddsen azal n 69 n yisaragen d yimyaggren deg yakk timnaḍin n tmurt, i usefhem i medden ɣef wazal d wamek ilaq ɣef umdan ad iseḥbiber ɣef ugama d twennaḍt. Rnu ɣer wahil uzzig i d-yellan i yigerdan (inelmaden) n uɣerbaz, ɣef teɣzi n 3 ssmanat n tigawt-agi. Yella-d deg-s uttekki n tmetti taɣarimt ur yesɛin tamtilt, ama d tiddukkliwin tisadarin (professionnelles), ama d tid n twennaḍt d yilemẓiyen, ama d tigrawin n yiskutiyen, ama d imezrawen (isdawanen), tiseqquma n tuddar neɣ n yimḍqan, iɣerbazen d udmawen n tmetti yettwassnen ɣer yidis n yiduba idiganen d yiɣsuren n ufran d wallus n usseqdec n wafrasen.I lmend n waya, daɣ deg lwilaya n Ǧiǧel d Ɛennaba, nulfan-d kra n tkebbaniyin i lmend n ulqaḍ n yiḍuman n uplastik, ara d-ixelqen ama d imekwan n uxeddim, ama d asizdeg n twennaḍt. Am wakken daɣen i d-heggan ticemliyin n uqɛad n kra n yimukan deg kra n lwilayat n unẓul n tmurt i wakken ad d-yili wallus n useqdec n wafrasen n uplastik, yernu iger-d uɣlif n twennaḍt tiɣri i yimdanen terza temsalt akken ad sseftin deg uḥric-agi i d-isekcamen idrimen.
Adaoun Abdelghani