Accueil Tamazight Tuɣal-as tejmilt meqqren sɣur tddukkla Tagmat

Amuli wiss 15 n tmettant n umjahed Ali Zamoum

Tuɣal-as tejmilt meqqren sɣur tddukkla Tagmat

40

I lmed n umuli wis 15 n tmettant n umjahed ameqqren n tegrawla n 1954, yuran isem-is s yisekkilen n wuraɣ deg yisebtar n umezruy amiran n tmurt n Lezzayer, Ali Zamoum, tuɣal-as tejmilt ass-nni n ssebt iɛeddan. D agrawliw-agi i d-iwekkel imḍebber ameqqren n tegrawla n 1954, Krim Belkacem, s usuffeɣ n tsayrut (aberraḥ) n umenzu (01) n unbir n useggas 1954 deg taddart n Yiɣil Imula, deg dayra n Yiwaḍiyen. Ihi, tella-d tejmilt-a deg wass-nni sɣur tddukkla Tagmatt n Ali Zamoum  » Afus deg ufus », deg uxxam n tddukkla-agi i d-yezgan deg tɣiwant n Buɣni.

Tajmilt-agi, tebda yakan ass-nni n larebɛa iɛeddan, 28 seg waggur n ɣuct 2019, anda i d-yella usersi n tmeqqunt n yijeǧǧigen ɣef uẓekka n ugrawliw, deg taddart-is Iɣil Imula, syin tella-d yiwet n tirza ɣer Uxxam n tujjya n Hallouane, yettwabnan s tallelt n tddukkla Tagmat i d-yexlaq Ali Zamoum, iɣef yella d aselway armi yemut. Ma d tajmilt tameqqrant, tella-d ass-nni n ssebt, 31 seg ɣuct 2019, anda ḥedren aṭas n wudmawen, Gar-asen, Dr Saïd Khelil, Dr Saïd Slimani, Maître Hocine Zehouane, Mass Amirouche Malek, Mass Taher Khaouas, Nna Wizza, tameṭṭut n umejjahd Ali Zammoum, d waṭas n yimeddukkal n tegrawla, tawacult tagrawliwt d yimdanen iḥemmlen argaz-agi.

Deg usarag i d-thegga tddukkla Tagmat, uɣalen-d yimussnawen , Nna Wizza , d yimeddukkal n umjahed ɣef umahil n Ali Zamoum, ladɣa tawuri-ines tagejdant deg Umussu aɣelnaw d wayen i d-icudden ɣer tira d usuffeɣ n tsayrut n umenzu n unbir 1954 deg Yiɣil Imula, imi yella gar wudmawen igejdanen n tegrawla i d-yefkan afud ameqqran i ubeddu n tegrawla mgal acengu afrensis. Nna Wizza, tuɣal-d s telqay ɣef ccfawat n urgaz-is, yellan gar yigrawliwen yezgan ɣer yidis n ugrawliw ameqqran, Krim Belkacem, Uɛemran, Ali Amellal, d wiyaḍ-nniḍen.  » Ali Zamoum, yekker-d d agujil n sin yimawlan, baba-as, d yemma-as ass-mi yella d agrud, d ayen i t-yeǧǧan deg temɣer-is yettḥulfu s wayen yettḥazen imeɣban, d yigujilen, d wid yenḥafen deg tudert, iwumi yettmuddu afus n tallelt s nnig tezmart-is.

Yekcem ɣer Umussu aɣelnaw d amectuḥ, yella yeqdec aṭas, ladɣa deg uwellah n yimazdaɣ ɣef unekcum ɣer Umussu aɣelnaw. Yella gar wudmawen igejdanen i yefkan afud i tnekkra n tegrawla n 54″, d ales Na Wizza. Tefka-d, diɣ, aṭas n yisallen d ccfawat ɣef wayen yeɛnan asuffeɣ n tsayrut n umenzu n unbir 54. Seg lǧiha-as, Mass Hocine Zehouane, yuɣal-d s wawal ɣef umahil agrawliw n umjahed d tebɣest yesɛa , ladɣa ass-mi yella deg lḥebs. Yenna-d : » Sneɣ-t deg lḥebs, anda ḥekkmen fell-as s lmut, ɣas akken , yesɛa tabɣest meqqren, anda ur iḥar ara yakk deg waya.Yezga yettwanas imeḥbas-nniḍen.

Yergem iserdasen n ucengu afṛensis, s lfeḥr meqqren i d-yebder atteki-ines deg Umussu n ALN. » Aṭas n ccfawat i d-ulsen yimeddukkal n Ali Zamoum akked kra n wudmawen ɣef tudert n umjahed seld timunent n Lezzayer (1962), d wafud i d-yefka i Umussu adelsan amaziɣ, gar-asen Saïd Khelil, Saïd Slimani d wiyad-nniḍen. Ɣer tagara n temlilit, yuɣal-d, uselway n tddukkla Tagmat ɣer temsirin tigejdanin n talsa yerṣa i lebdda deg wallaɣ n yimeɣnasen n tddukkla n ugrawliw Ali Zamoum.

I usmekti kan, Ali Zamoum, ilul ass n 20 deg wagur n tubeṛ 1933, deg taddart Iɣil Imula. Yettwaṭṭef deg waggur n fuṛaṛ n useggas n 1955, deg taddart Iɣil Bulkaḍi, deg lɛerc n Mɛatqa, anda yella yetɛawen imeddukkal-is d gma-s Muḥamed Zamoum, iwumi ssawalen colonel Si Salaḥ. Yettwaḥbes deg Lezzayer, syina deg tmurt n Fṛansa, yeffeɣ-d srid sed timunent n Tmurt. Yuɣal d imeḍebber amenzu ( préfet) n ugerzu n Tizi Uzzu, amḍiq seg i d-yeḥbes, kra n wakud kan s ssebba n umgarad i d-yellan d unagraw n tmurt imesbaṭliyen. Yura umeɣnas sin n yidlisen, « Tamurt n Imaziɣen « , d  » Mémoires d’un survivant 1940-1962″.

Ali Zalouk