Aṭṭas i yenwan yekfa waṭṭan n Covid-19 imi yettwakkes ukman deg lwilaya n Tizi Uzzu. Acu kan deg yiwellihen i d-ffkan yimejjayen, nnan-d xas ulamma ad ffɣen medden, ilaq fell-asen ad qaddren kra n tɣawsiwin, gar-asent asexdem n tekmamin, tarda n yifassen yal tikkelt u ad ttembaɛaden gar-asen. Ma deg unnar, yeḍra-d wayen-nniḍen, serḥen yimdanen i yiman-nsen am wakken ulac akk ayen yeḍran. Qlilit wid yesexdamen ttawilat-agi n useḥbiber ɣer waṭṭan n Coronavirus.
Segmi i yettwakkes ukman deg lwilaya n Tizi Uzzu, i d-yelhan niqal s useḥbiber ɣef waṭṭan-agi deg wagguren yezrin u i d-yefkan igemmaḍ igerrzen, ha-t-an yettnerni tura ugemmuḍ n yimdanen i yeṭṭfen Covid-19 ɣef wakken i t-id-wekkden yimḍebbren n tezmert n lwilaya n Tizi Uzzu. Imḍebbren i d-yennan urǧin tesaweḍ lwilaya n Tizi Uzzu agemmuḍ am win n tura anda ara naf azal n 170 n yimdanen i yettaṭṭaf waṭṭan n Covid-19 u mmuten 19 seg wass n 25 ar 30 deg waggur-agi i deg-i nella. Xas ulamma yella-d waya, meɛna amur ameqqran n yimdanen mazal-iten ur ttamnen ara s waṭṭan-agi, ayen yeǧǧan ad d-yini yiwen urgaz :’’Win yebɣan ad iẓer u ad yekkes ccekk ɣef yiman-is, yeshel maḍi.
Ad iruḥ ɣer sbiter, ad yemsalam akked wid ihelken, syin, ad yerǧu ad iwali ma ad t-yenṭeḍ neɣ ala. Deg taggara, ad aɣ-d-yerr s lexbar. Ma d asfuǧǧeɣ-agi, neɛya seg-s’’. Seg 7 yunyu iɛeddan, uɣalen yimdanen ula ɣer tmeɣriwin, inejmuyeɛ deg ssuq neɣ anda-nniḍen, wammag deg temdinin timeqqranin, ulac akk aḥezzeb, am wakken acemma ur yeḍri, ula sdaxel n tḥuna, ur ttqadaren ara iwellihen. Ɣef waya i yennerna ugemmuḍ n wid i t-yeṭṭfen deg temdinin timeqqranin, yecban tamdint n Tizi Uzzu, Iɛezzugen, Larebɛa Nat Yiraten, Draɛ Ben Xedda…atg. Tawaɣit-a, tesenṭṭeq-d i tikkelt-nniḍen imejjayen n tama-agi i wakken ad sutren aqader n yiwellihen n useḥbiber ɣef waṭtan-agi. Sutren ula deg yimḍebbren teɛna temsalt i wakken ad d-afen tifrat i ustehzi-agi n yimdanen.
Ḍelben ula d tuɣalin ɣer ukman, ladɣa tura imi i bdan la ttuɣalen ttawilat n usiweḍ yerna mebla aqader n useḥbiber ɣef Covid-19. S umata, aya-agi, yeɛna akk tamurt n Lezzayer, imi taggara-agi yenṭeg ugemmuḍ n wid yuḍnen aṭṭan-a armi qrib yewweḍ 400 n yimdanen i t-ihelken deg wass. Deg snat n smanat-agi iɛeddan, ttaṭṭafen-t, yal ass, ugar 500 n yimdanen.
Hocine Moula