Accueil Tamazight Tuẓẓut n 11 600 n yisekla

Wehran

Tuẓẓut n 11 600 n yisekla

53

I lmend n usfugel n wass aɣelnaw n useklu i d-ittezzin yal ass n, 25 tuber n yal aseggas, tessuddes-d twilayt n Wehran leqdic d ameqqran, d win iwumi tefka isem « Aseklu i yal aɣerman ». D tikti i d-yebdan seg waṭas n twilayin n tmurt i d-yessawlen deg wussan yezrin ɣer tigawt-a, ma d iswi n leqdic, d asebgen n leḥmala n uɣerman azzayri i ugama d uḥareb ɣef twannaḍt. Dɣa di twilayt n Wehran, sya ar taggara n waggur n meɣres 2020, d asirem n wuẓẓu n 11 600 n yisekla imecṭaḥ.

Ass n tullya n leqdic-agi, yekki deg-s ula d aqerru amenzu n twilayt Mass Ɛebdelqader Ǧellawi d yimasayen-nniḍen n twilayt d tɣiwanin timeqqranin. Ma d idgan ideg ara ttwaẓẓunt ṭṭjur-agi n leṣnaf yemxalafen, bdan ass n acer, 27 tuber iɛeddan, seg wasun n Butlilis, uqbel ad qerben ɣer tamiwin yecban Wad Tlilat, Belgayed, Msergin, Lḥasi … atg. Akken daɣen ara ttwaẓẓun ddeqs n yisekla deg tẓegwa tigeɛmirin i tekseb Wehran, am teẓgi n Kanastel, adrar n yizmawen (Gdeyel), tiẓgi Msila (Msergin). Ad d-nesmekti belli leqdic-a igerrzen, ad kkin deg-s yinelmaden n yiɣerbazen akken ara d-tturebbin s leḥmala n ugama, Tanmehla n uḥareb ɣef tẓegwa d tddukkliwin tinmettiyin yettwassnen s leqdic-nsent d tmerna n ubaɣur i ugama.

Khaled Achoui.