Ussan n 27 d 28 duǧember yezrin, deg uxxam n tddukkla Itri Adelsan n Uqbu, d uxxam n yilmeẓyen Ɛebderreḥman Fares deg Tefrit, i d-tella tfaska n tmedyazt n Ssumam, deg teẓrigt-is tis mraw d sin (12). D tajmilt i yuɣalen i tmedyazt d temyarut Nadiya Benamar. Ččurent-d tzeɣwa s yinebgawen; d imedyazen i yekkin deg temsizzelt, d imedyazen-nniḍen i d-yusan ad ḥeḍren, d iɛeggalen n teseqqamut n ufran (imedyazen iqburen), d wudmawen n yidles s umata. Usan-d daɣen kra seg yiɛeggalen n Tddukkla Numidya n Wehran, imi neẓra d akken Nadiya gar yiɛeggalen iqburen n tkdukkla-a, rnu d tamezdaɣt n temdint n Wehran. Yebda wass amezwaru s tukci n warrazen i wid i d-yufraren deg temlilit yezrin, syin tella-d tullya tunṣibt n temlilit-a tis 12 sɣur Mass Mulud Salḥi, aselway n tɣiwant n Uqbu. Umbeɛd, d asenẓer n usaru ɣef tmeddurt n tmedyazt Nadiya Bennaɛmer, syin yella-d urfad n wawal sɣur-s. Uqbel ad tebdu tedwillt tamezwarut n temsizzelt. Ma deg wass wis sin, llan-d yisaragen i d-wwin yiselmaden n tesdawit n Tizi Uzzu, Mass Muḥend Akli Salḥi d Mass Ḥasan Ḥelwan ɣef talliyin tigejdanin d umhaz n tmedyazt taqbaylit, syin d akemmel n tedwilt tis snat n temsizzelt. Ar taggara n usiwel n yisefra, ufraren-d : Zeyan Brahem, Ḥedduc Ǧilali, Arib Masinisa s warrazen imenza, wis sin d wis kraḍ. Xabar Salma, Bensid Sabrina s warrazen imenza d wis sin n usebɣes. Akken i d-tufrar Massa Idiri Nura s warraz n tmedyazt n tmeṭṭut. Wwin arrazen-nsen, seld mi d-yella ufran-nsen, mbeɛd asqerdec gar yiɛeggalen n teseqqamut n yimeẓẓurfa. Yenna-d yiwen n uɛeggal i yekkin deg uheggi n temlilit-a tis 12, d akken «tɛedda akken iwulem tfaska-a, aṭas n usfaydi i wwin wid iḥeḍren, umren s waṭas yimedyazen i d-yufraren, nessaram aseggas i d-iteddun d tafaska ara d-yuɣalen deg talwit». Akken daɣen i nemmeslay d Massa Nadiya Benamar, tumer ayendin s tejmilt-a, tenna-d «Ḥulfaɣ d akken armi d tura ara d-yebdu uxeddim ameqqran. Ɣas akken ul-iw yeččur d lferḥ, maca ḥulfaɣ d akken taɛkemt ẓẓayet amakter sya ɣer sdat. Ɣef waya, tura ur nesɛi ara lḥeq i ustehzi deg wayen merra yerzan tamaziɣt. Seg tama-nniḍen, tajmilt-a ḥesbeɣ-tt d asteɛref i umennuɣ ɣef tutlayt, neqqar : rendre à César ce qui appartient à César (Err i Sizar ayen yellan n Sizar)». Deg urajǧu n tuzzya n wakud, d tisin n tfaska n qabel, nessaram afud igerrzen i wid i d-yessuddsen aneḍruy-a.
K. A.