Azekka n ttlata, 17 cutember 2019, ad as-tuɣal tejmilt meqqren i yiwet gar tgejda n tezlit taqbaylit, wagi d Ccix Lḥesnawi. Ad yili usiher-agi, deg tzeqqa n Opéra “Buɛlam Bessayeḥ” n Lezzayer Tamaneɣt, si 19h30 n tmeddit. Aṭas n yicennayen iqburen ara as-yerren tajmilt i ucennay-a i d-yefkan aṭas i tezlit taqbaylit. Yetturaǧu ad yecnu di tejmilt-a ucennay Abdelqader Caɛu, Lḥesnawi Amecṭuḥ, Kamel Meẓyan ɣer tama Buɛlam Caker. Tamkaḍuft akked tmenna n yisefra, ad tili sɣur umedyaz Aziz Fellag. D aɣlif n yidles i d-yessuddsen leqdic-a s lemɛawna n tzeqqa-a n Opéra n Lezzayer Tamaneɣt.
Ad d-nesmeki kan belli Ccix Lḥesnawi, s yisem-is aḥeqqani Si Muḥ n Amar u Muḥ, ilul ass n, 23 yulyu 1910, di Taɛzibt di lɛerc Iḥesnawen di tama n At Dwala. Yettwassen s yisem Ccix Lḥesnawi imi laṣel-ines n Iḥesnawen, di lekwaɣeḍ yers s yisem n Muḥemed Xelwat. Yekker-d d agujil n yemma-s d baba-s, asmi yesɛa 14 n yiseggasen, iruḥ ɣer Tizi Uzzu, dinna icennu di leqhawi, ur iɛeṭṭel ara di Tizi Uzzu ikemmel abrid-is ɣer Lezzayer tamaneɣt. Deg useggas n 1935, yessuffeɣ-d Ccix Lḥesnawi tasfift-is tamenzut anda i yecna ɣef lɣerba. Deg useggas n 1937, yunag ɣer Fransa anda ikemmel asuffeɣ n tisfifin-ines.
Kra tekka lgirra n 1954-1962, yeḥbes ccna syin akkin i kemmel-it armi d aseggas n 1968, dɣa yegzem-tt di rray-is belli ad yeḥbes ccna i lebda. Yecna Ccix Lḥesnawi 46 n tezlatin, 29 deg-sent s teqbaylit, ma d 17 tiyaḍ s dderǧǧa (taɛrabt n Lezzayer). Deg yiseggasen n 70, ibeddel akk tamurt, yunag i tikkelt taneggarut ɣer Tegzirt n La Réunion deg tmurt n Fransa. Di Tegzirt-agi, ikemmel tudert-is armi d asmi i yemmut ass n, 06 yulyu 2002.
A. A.