Accueil Tamazight Tuɣal-as tejmilt meqqren deg taddart-is Ibeskriyen

AƔrib - I lmed n usmekti wis 65 n tmenɣiwt n umeɣras Didouche Mourad : Tuɣal-as tejmilt meqqren deg taddart-is Ibeskriyen

114
- PUBLICITÉ -

Yiwen gar wudmawen igejdanen n tegrawla n 54, i yefkan idamen-is ɣef tmurt n Lezzayer, Didouche Mourad, i yettwanɣan ass n, 18 deg yennayer 1955, deg lwilaya tagrawliwt tis snat ( Qsantina).

- PUBLICITÉ -

I lmend n usmekti wis 65 n tmenɣiwt-is, tuɣal-as tejmilt meqqren deg taddart-is Ibeskriyen, deg tɣiwant n Uɣrib, i ibeɛden s wazal n 45 n yikilumitren ɣef ugafa/asammar n temdint n Tizi-Uzzu. Tella-d tejmilt-a ass-nni n ssebt iɛeddan, 18 deg yennayer, deg taddart-is. Dɣa deg tsebḥit n wass-nni n usemkti, tella-d tẓunẓut n yiwen n usebdad ɣef cfawat n umaɣras n tegrawla n tlelli n tmurt n Lezzayer. Yettwabna usebdad deg tlemmast n taddart n Ugni Ucerqi deg tɣiwant n Uɣrib anda ḥeḍḍren yimḍebbren n Useqqamu Aɣerfan Aɣiwan n Uɣrib, imezdaɣ n n tɣiwant-a akked yimjuhad n temḍiqt-agi n Leqbayel. Deg wawal yettunefken i uselway n Useqqamu Aɣerfan Aɣiwan n Uɣrib, Mass Amirouche Messis, yesnemmer yakk imdanen i d-yefkan afus n tallelt deg usemres n uneḍru-agi. Ɣef leḥsab n uselway, tajmilt-agi meqqren yuklal-itt urgaz-agi i yefkan tarwiḥt-is i tmunent n tmurt n Lezzayer.  » Didouche Mourad laṣel-is n taddart n Ibeskriyen, deg tɣiwant n Uɣrib, lwilaya n Tizi Uzzu.

Tajmilt-agi d ales n cfawat n yimeḍebber ameqqran n tegrawla n 54, i d-yefkan aṭas i tegrawla. Yewwi-d fell-aɣ ass-a , ad d-nesmekti s userdu n umeɣras-agi amennuɣ-is mgal acengu Afransis. Yewwi-d fell-aɣ daɣen, ad d-nkemmlet amennuɣ-is d umennuɣ n yimeddukkal-is akken ad d-terṣu Tegduda d tenkelwit ( prospérité)’’, i d-yenna Mass Amirouche Messis. Ayen yernan ɣef waya, heggan-d widak i d-yessuddsen asmekti wis 65 n tmenɣiwt n umeɣras yiwen wahil s wazal-is, anda ara naf yiwet n temsikent meqqren i d-yettalsen tudert n Didouche Mourad akked temsikent i d-yettalsen tudert n yimḍebbren n tagrawla n 54. « Temsikent-agi, ad d-tesken i tsutwin timaynutin amezruy n tmurt-nsen’’, i d-yenna yiwen n uɛegal n Useqqamu Aɣerfan Aɣiwan.

Am wakken llan daɣen aṭas n leqdicat, dɣa ad nebder, taẓrigt tamezwarut n Semi-marathon i yewwin isem Didouche Mourad, anda i kkan yinadalen i d-yussan seg wugar n 20 n lwilayat n tmurt. Ad d-nesmekti kan d akken tajmilt-agi, thegga-tt-id tɣiwant n Uɣrib s tallelt n Useqqamu Aɣerfan n Tizi Uzzu, Tuddsa taɣelnawt n yimjuhad d Teseqquma n tudrin n Uɣrib. Ilul Didouche Mourad ass n, 13 yulyu 1927, deg Lezzayer tamanaɣt. Laṣel n yimawlan-is n taddart n Ibeskriyen. Ameɣras iwumi qqaren si Abdekader yettwanɣa deg, 18 yennayer 1955, deg lwilaya tis snat (Qsentina), yefka afud meqqren i tegrawla n 54.

Ali Zalouk

- PUBLICITÉ -