Seg yisental iɣef ttmeslayen medden ussan-a, d liḥala n tegnawt i iqessḥen nezzeh, armi tugi ad tebru i yimeṭṭawen-is. D tidet ur teqqim tegnawt teεdel akken i tella zik, imi deg tallit-a, tamurt ur teksib ara 4 n tsemhuyin( saisons ). Lameεna, ayen ideg nella aseggas-a, yugar wid yezrin. Meḥsub deg yiseggasen iεeddan, deg wayyur n fuṛaṛ, tekkat-d lehwa. Rnu i waya tifesniwin n lḥamu deg-s, εedlent. Ma yella d aseggas-a, tifesniwin tiεlayanin, lehqent armi d 26 deg twilayin n ugafa n tmurt, ad as-yini yiwen deg unebdu i nella. Ahat ula d ayen i iḍeṛṛun deg tallunt ( espace ), am uxemmuj aberkan, d tamentilt n ubeddel n unezwi( climat ). Γas ma yella mgaradent tmentilin ɣef leḥsab n tmuɣliwin n medden, dɣa wa yeqqar texṣeṛ liḥala n lqaεa. Wayeḍ yeqqaṛ d Bab n Yigenwan i yerfan ɣef medden. Wiyaḍ seg tama-nsen, nnan-d belli tamentilt n waya, d tiẓegwa n yemɣan i yerɣan uɣalent d iɣed, akked tuẓẓut n ttjuṛ ideg stehzan yimdanen.
Meεna, yella yiwen n uḥulfu i ten-yezdin, imi akken ma llan kukran imal i yettraǧun ma tkemmel akka. Aredmani, uzzlen yimezdaɣ deg tuddar ɣer tẓallit, ahat ad isel Yellu i wayen ssuturen, ad tebru tegnawt i waman-is, amedya d taɣiwant n Yiɣil Ɛli. Ma yella deg taddart n At Saci, nnejmaεen At taddart, ffɣen-d s ṛṛay, belli ad uɣalen ɣer leεwayed n lejdud-nneɣ. Ad d-ḥyun ansay n unẓaṛ. D arrac n taddart imecṭaḥ, ara yessutren i Yellu anẓaṛ. Acku nutni mazal sɛan nniya, mazal ulawen-nsen zeddig. Ahat ad d-imuqqel Ṛebbi i wudmawen-nsen, ad yebru i ugeffur. Ad d-nesmekti d akken, ula d arrac imecṭaḥ umren ayendin, dɣa d wagi tura i d ameslay-nsen. Ayagi imi, d tagnit i ucmumeḥ seg tama, seg tama-nniḍen, ad issinen yiwen seg wansayen n yimezwura-nneɣ.
K. K.