Tettili-d temsizzelt n tazzla akk tameqqrant deg umaḍal deg tmurt n Marikan, d timsizzelt (marathon) yettawḍen ɣer 42 n yikilumitren. Yettili-d deg temdint n New York, yettili tikkelt i useggas, yal ass n acer amenzu deg waggur n unbir. Maca ayen yessefraḥen deg umaraṭun n tikkelt-a i d-yeḍran ass n acer, 3 unbir 2019, d akken tufrar-d yiwet n tlemẓit taqbaylit i igensesen akken ilaq tamurt n Leqbayel.
Tagi d Roza Fedila, seg temnaḍt n At Mlikec (Bgayet). Tuzzel gar 53 000 n yimekkiyen, ɣef teɣzi n 5 n yisragen, 36 n tesdatin d 7 n tsinin. Ar taggara tessaweḍ ad d-tufrar gar yimenza, d ayen i tt-yeǧǧan ad d-tawi arraz. Ayen yernan iseɣ i tlemẓit-a, imi ur tettu ara ansa i d-tɛedda (iẓuran-is), acku terfed annay n yimaziɣen s tfenṭazit, d ayen i yesferḥen aṭas n yiqbayliyen mi tt-walan neɣ slan yis-s, ladɣa imi tineggura-a yettwagdel ureffud neɣ tikli s usenǧaq-agi deg tmurt n tmazɣa, llan ula d wid ikecmen takurmut ɣef lǧal-is !
I usmekti, Roza Fedila, deg leɛmer-is 33 n yiseggasen, tettidir deg tama n Brooklyn (New York) seg useggas n 2013. Tḥemmel addal n tazzla segmi tella d tanelmadt tasdawant deg Bgayet. S wakka ad tɛeddi ɣer temsizzelt-nniḍen ara d-yilin deg temdint n Berlin deg Lalman.
Kh. A.