Di lawan anda yessaram ugdud ad tbeddel fell-as teswiεt ɣer wayen igerrzen, ad yelhu waddad n tmurt s umata, deg wakud anda i ṭuqqtent tikliwin n tlelli, tuli taɣect n medden, i wakken ad sseɣlin lbaṭṭel, teqseḥ teswiεt mliḥ ɣef uɣerman azzayri, imi yufa-d iman-is yettnaɣ akked wakud, akken ad yedder. Win yegren tamawt i tsertit n tmetti ussan-a, ad iwali belli ayen i ten-iceɣben ugar, d aɣrum-nsen amek ara t-id-gren. Rnu i lqella n yimeḍqan n uxeddim, d ssuma ṛxiṣen s wacu i ixeddmen. Ula d ssuma n sselεa, tuli nezzeh di leswaq. D tidet, aswir n tudert n yizzayriyen, si zik ur yelli d win yelhan, lameεna ussan-a tuɣal temεict d aɣilif i yimdanen.
Ula d ayen yellan ttaɣen-t-id yakk medden, zemren-as, yuɣal umur ameqqṛan ur as-yezmir ara. Amedya d ssuma n timellalin i yulin, telḥeq armi d 400 n yidinaṛen i 30. Mebla ma nettu belli, ayyur ɣeṛ deffir tella 200 n yidinaṛen kan. Ad d-nesmekti d akken ula d ssuma n yigumma d tidal (legumes) tkennef. Am llubya i yewwḍen armi d 140 n yidinaṛen, zṛudiya akked lleft 100 n yidinaṛen, ula d lbaṭaṭa dɣa, tugar 60 n yidinaṛen ussan-a. S unamek-nniḍen, ɣlayet nezzeh temεict, armi tuɣal d awezɣi i kra n yiɣermanen, abeεda i yiẓawaliyen, d wid ur nxeddem ara.
Γef usentel-a tenna-aɣ-d yiwet n temɣaṛt i-d-nemlal di ssuq : «Di tmurt yeɣɣentren seg yal tama, sselεa ɣlayet di ssuma, amdan ṛxiṣ di lqima. Amek ara yedder win i yettaɣen 12 000 n yidinaṛen i wayyur? Neεya deg lḥif». Tkemmel deg wawal-is, tenna-d : «D ilimẓiyen i d asirem n uzekka, ihi yewwi-d ad kemmlen abrid n tegrawla, ahat ad tbeddel teswiεt fell-aɣ».
K. K.