Accueil Tamazight Tulya n 26 n tneɣriyin n uselmed n tutlayt tamaziɣt aseggas-a

MESTƔANEM Asegmi Aɣelnaw

Tulya n 26 n tneɣriyin n uselmed n tutlayt tamaziɣt aseggas-a

54

Iberreḥ-d unemhal n usegmi n lwilaya n Mestɣanem, ass-nni n larebɛa, 18 cutember 2019, s tulya n 26 n tneɣriyin n uselmed n tutlayt tamaziɣt deg lwilaya-a, i lmend n useggas aɣurbiz n 2019-2020. Yenna-d Mass Larbi Benchahra, deg yiwen n usarag n Tddukkla n Yineɣmasen n Twilayt n Mestɣanem belli : “Tineɣriyin-a, ttwareẓment (ttwalint) deg 13 n yiɣerbazen, i d-yezgan merra dayrat n lwilaya-a, maca, di tin n Ɛin Nwiṣi alamma d aseggas aɣurbiz amaynut i d-iteddun ara llin deg-s tineɣriyin i uselmed n tutlayt tamaziɣtˮ.

Yerna-d umasay-a belli iselmaden ara yeslemden deg tneɣriyin-a, ad asen-tettunefk tnezduɣt. Ɣer taggara n usarag-is, yefka-d taḥawact ɣef uselmed n tmaziɣt, dɣa yenna-d : “Aselmed n tmaziɣt deg lwilaya n Mestɣanem yennerna s waṭas deg sin-a n yiseggasen ineggura, imi deg useggas aɣurbiz 2017-2019, llint tneɣriyin deg 5 n yiɣerbazen, sakkin nerna nelli 8 n yiɣerbazen ilindi (2018-2019). Annect-a, yella-d s uḍfar n lewṣayat n uɣlif n usegmi d tririt i usuter yettnernin n yimawlan n yinelmaden, i wakken ad lemden warraw-nsen tutlayt-a tunṣibt.

Ghani Amazigh