Accueil Tamazight ‘’ Tura, temla-aɣ-d termit acḥal i texser tarrayt-nni n usemnenni n waṭas...

‘’ Tura, temla-aɣ-d termit acḥal i texser tarrayt-nni n usemnenni n waṭas n yilsawen deg yiwen udlis’’

Yahia Bellil

612

“Tamaziɣt di lakul” d yiwen yiswi aqdim; nennuɣ fell-as, newweḍ ɣur-s. Asmi i t-id-nessasi, nufa-t d ilem. Yusa-d, yufa-aɣ-d nexla. Akken nettkemmil deg-s, “nettrebbi ilem” (Ait Menguellet); ur-as-nhegga ara tisulal yersan. Ar ass-a, mazal tamasalt n tutlayt ur tefri ara : d tutlayt neɣ d tutlayin ? s tfinaɣ neɣ s wayen-nniḍen ? Deg temnaḍin anda tella tmaziɣt, yal tama, tesselmad tantala-ines; anida-nniḍen, yal aselmad yesselmad tin-ines : Aqbayli yesɣaray taqbaylit, Acawi yesɣaray tacawit, atg. Acimi akka ? Axater, ulac nneyya n lebni. Wanag d acu i yeṭṭfen adabu ur ibeddel ara talɣa i yiḍrisen n Uwanek akken ad iserreḥ yifer n tmaziɣt ? Mi ara tafeḍ “La Loi d’orientation, 2008) mazal teqqar-d almud n tmaziɣt ar bu lebɣi, d acu i tenwiḍ ad d-teglu yis-s deg wayen yelhan ? Tagi n bu lebɣi d akellex ! Cwiṭ-nni n yiεerbawalen i yeṭṭafaren almud n tmaziɣt, yettabaε-iten uḍad n usekkak, tixiren, yettɣimi-d uselmad i iman-is deg tneɣrit, war inelmaden. Dagi diɣen, ilaq ad beddlen yisuḍaf. Seg tmendawt alamma d asaḍuf aneggaru n usnas deg unnar. Ahat, d tuddsa n Uwanek ara ibeddlen seg uẓar.

Ayen yelhan deg temsalt n tmaziɣt deg uɣerbaz, d tarmit-a i d-negmer. Amecwar i d-nedda di tpidagujit yelha. Simmal nsuruf, simmal ttbanen-d wuguren n tidet iɣef ilaq ad nadin yimassanen, yal yiwen deg taɣult-is. Yegget umahil. Llant kra n temsal tigejdanin, rzant arraten n ulmud d tarrayin n uselmed : Iselmaden mazal εad i sεin adlis n tjerrumt taɣurbizt. Ihallen n uselmed, bdan ṣeffun, tebda tzerri deg-sen tafat, maca mazal deg-sen afras d telqim. Yezmer ad beddlen seg uẓar ma tella tmuɣli talqayant ara d-yemlen iberdan iwulmen, ama i uselmed n tutlayt n tyemmat, ama i tutlayt tis-snat. Idlisen diɣen, ttbeddilen i lmend n yihallen. Tura, tarmit temla-aɣ-d acḥal i texser tarrayt-nni n usemnenni n waṭas n yilsawen deg yiwen udlis am winna n uswir wis-4 alemmas. Taluft n tarrayin n uselmed, ula d nutenti d taluft meqqren. Tebda tṣeffu deg wallaɣen, maca mazal amahil fell-as. Ilaq ad yekfu uṭebbeε, ad nekcem deg tallit n uselmed n tidet. Yessefk, yal yiwen iqeddcen deg unnar, ad yeqbel ad yekcem deg usileɣ imezgi akken ad yezmer ad yesɣer tamaziɣt s ubrid ussnan i yeddan d yimir-a.
Yesteqsa-ten Hocine Moula