Accueil Tamazight Uɣalen yiberdan d amahi ɣef yinehhaṛen

Iderginen

Uɣalen yiberdan d amahi ɣef yinehhaṛen

28

Tessegra-d lehwa i d-yewten ussan yezrin axessar deg waṭas n yimeḍqan. Dɣa lemḍeṛṛa i d-iga ugeffur i d-yewten deg tefsut-a, ur t-nwala ara deg tegrest yezrin. Amedya, d abrid yellan gar At Smaεel d Burǧ Mira, i iceqqen mliḥ, ugar n wamek yella yakan. yerna akken zerrin wussan i yettṣubbu d akessar, imi akal-is ur iṛeṣṣa ara, yerna akken d-qqaṛen yimezwura n tuddar-agi, zik yella wasif deg umkan-nni. Neɣ s unamek-nniḍen, akal-is d imeddiqi. Daymi i d-yeḍḥa d amahi ɣef yinehhaṛen i yettεeddayen syin-a. Rnu i waya, ula d abrid aɣelnaw wis 09, i yellan gar twilayt n Bgayet d tin n Sṭif, ur yeslik ara. Dɣa, deg umkan iwumu qqaren amḍiq n uẓebbuc, i yellan gar tdayṛa n Iderginen, d tin n Suq Letnin, izuq ( yegrareb ) uzgen n ubrid, anda i tdeggiṛen ahicuṛ. Ad d-nesmekti belli, abrid-a yettwassen s tewεeṛ-is, acku ḥezziq, yerna yeččuṛ d ṭṭuṛnat ( virages ). Akken yeqqar yinzi “Yella uɣrum d acuraq, yerna aḥraq”. Lameεna, Ccil yella akken, ttḥadaren iman-nsen wid yettεeddayen syin. Ma d tura, ufan-d iman-nsen deg uɣbel agaεmir, ladɣa imezdaɣ n tɣiwant n Iderginen, imi abrid wis sin yellan gar snat n tɣiwanin-a, diri-t nezzeh. Ɣer taggara, ad d-nini d akken xas lecɣal n uqeεεed n ubrid-a, teddun akken ilaq, meεna, nessaram ad xeddmen ccɣel yelhan, d win idumen daɣen.

K. K.