Accueil Tamazight Uɣalen yigezzanen d imakaren

BGAYET Seg waṭṭan ɣer wayeḍ

Uɣalen yigezzanen d imakaren

160

Gar yineḍruyen inmettiyen i d-yeslalayen lḥir d uttqelleq ɣur medden iseggasen-a ineggura, yella win n tirziwin yeṭṭuqqten ɣer yigezzanen, neɣ iderwicen.

Deg usamar n Bgayet, ayendin d imsaɣen i snubguten yal ass yimdanen-a i d-yeqqaren ẓerren imal d wayen ara yeḍrun ɣer sdat. D tulawin, d tullas, d timɣarin neɣ d irgazen, tal tikkelt ad yeɛnu yiwen imeḍqan-a akken ad d-yefru ugur-a neɣ d wa, ɣef tmuɣli-s. Ɣas ulamma, mi nemmeslay d kra n yimdanen ɣef taluft-a, iban-aɣ-d ddeqs seg-sen i iɛennun igezzanen-a akken kan ad bennsen, ad ttheddnen. Yettusemma, ɣas ẓran mačči ɣur ugezzan i tella tbadut i uɣbel-nsen, wanag ttɛemmiden ɣur-sen i umager n wawal aḥlawan, n umiru, d yisalli yessefraḥen. Rran-ten ihi am yimsujjiyen n tnefsit i asen-yettreqqiɛen lxaṭer mi ara yerwi. Ɣur yiɣermanen i iɛebbden iderwicen, tuɣal-asen tigawt d ansay i ilaq ad xedmen yal ayyur, neɣ tal ddurt. « Nekk ɣur-i yella wanida tettqisi tgezzant uɣur rezzun. Teskiddib tikwal d tidet maca tessen. Nekk yal mi ara ḍalleɣ fell-as, ad yers uqerruy-iw », i aɣ-d-tenna yiwet n teḥdayt seg Ayt Smaɛel. Ayen i d-ibanen am umihi, mi uɣalent ula d tiḥdayin ssuggutent rrwaḥ ɣur yigezzanen-a. Zik ala timɣarin, s nniya-nsen i nettwali ɣur-sen, maca tura tikwal ula d irgazen ḥemmlen asuter n tallelt ɣur yimdanen-a. Tarrayin n uqenneɛ n yikelyanen mgaradent ɣur yigezzanen, taɣara n usuter n udrim daɣen. Amedya, mi ara ten-teɛnu teqcict i yettnadin ad tercel, tikwal ssuturen deg-s ugar n umelyun n santim ɣef tikkelt, qqaren-as ad akem-id-yas unexḍab deg wayyur neɣ sin. Taḥdayt, ad teqqim tettgani, idrimen ad ruḥen d timẓin i ičča yilef. « Mačči d ayen i d-yettawin tumert i wul mi ara iwali yiwen amek tella tikli tamirant n tmetti-nneɣ akked yimdanen i tt-yebnan ɣef ukellex. Tallit-a taneggarut, sseḍmiɛen ula d tiḥdayin i yeddan di leɛmer, qqaren-asent buddemt-aɣ-d imelyan ad tzewǧemt deg wayyur neɣ sin. Yesḥissif lḥal imi aṭas i itteddun di tqeffet, ttamnent-ten », i d-yenna yiwen n urgaz.
M. K.