Accueil Tamazight Uɣalen yimasnayen n yimsikliyen ɣer uxeddim

Mɛatqa- Seld aṛgam n yimeḍebbren teɛna temsalt

Uɣalen yimasnayen n yimsikliyen ɣer uxeddim

27

Mbaɛd ugar n ddurt n usunded n yimasnayen n yimessikliyen n tɣiwant n Mɛatqa, yettawin seg tlemmast n tɣiwant ɣer tuddar n At Aḥmed, At Zɛim, Iɣil Zeggaɣen, Tizi Tzegart, Tajediwt, lɣil Aṭwen, Taxribt, d Lbir s sebba n yir addad ideg i d-yeggra ubrid ideg xeddmen, uɣalen ass-nni n arim iɛeddan ɣer uxeddim seld aṛgam (promesse) n yimḍebbren teɛna temsalt s uqɛad n ubrid-agi aɣiwan, sya ɣer unebdu anda ad d-tili tduli-ines akken iwata lḥal.

Dɣa d takebbanit yetabaɛen ɣer Tenmehla n useḥbiber n tẓegwa (Djurdjura) i yebdan yakan deg uqɛad d usewsaɛ n ubrid-agi seg ddurt iɛeddan, anda i d-tella tduli n kra n yidigan i d-yeggran deg yir addad s ṛmel azuran. Am wakken daɣen ɣummen tuget n yixejḍan yeččuren abrid. Assunded-agi i iɛeggeben imezdaɣ n ṭamet n tudrin n tɣiwant, ladɣa arrac n yiɣerbazen yemgaraden n tɣiwant n Mɛatqa. Mbaɛd ugar n kraḍ n yiseggasen n ssber ɣef yir addad n ubrid-agi aɣiwan d usɛuẓẓeg n tmeẓẓuɣt n yimḍebbren teɛna temsalt ɣef wayen ssuturen yimasnayen d imsebriden, ladɣa iɛeggalen n Useqqamu aɣerfan aɣiwan n Mɛatqa, d Tenmehla n lwilaya i d-yelhan s ixeddimen n uzayaz, gezmen-tt deg rray yimasnayen s uneḥbus ɣef uxeddim mebla tillas, yebdan ass-nni n acer, 17 seg unbir armi d ass-nni n arim, 25 deg unbir, seld amtawa i d-yellan deg unejmuɛ yezdin imasnayen d imeḍebber amezwaru n wasun n Mɛatqa, aselway n Useqqamu aɣerfan aɣiwan n Mɛatqa, imḍebbren n Tenmehla n yixeddamen n uzayaz, anda i d-yella waṛgam ɣef uqɛad n ubrid-agi d tduli-ines akken iwata deg unebdu i d-itddun.

Ali Zalouk