Accueil Tamazight Uṭṭun uzzig i Matub, wayeḍ i Ayt Mengellat

Tasɣunt taseklant Tamaziɣt Tura : Uṭṭun uzzig i Matub, wayeḍ i Ayt Mengellat

56
- PUBLICITÉ -

Deg wussan-agi i d-iteddun, ad d-yeffeɣ wuṭṭun wis 15 n tesɣunt taseklant tamaziɣt Tamaziɣt Tura, i d-yessizrig yal aseggas Useqqamu Unnig n Timmuzɣa (HCA). Uṭṭun-agi wis mraw d semmus, ad yili d uzzig i ucennay d umedyaz amḥadi aqbayli Matub Lwennas, i lmend n usmekti wis 20 n tmenɣiwt-is d umulli wis 63 ɣef tlalit-is.

- PUBLICITÉ -

D tasɣunt i d-yettefɣen yal aseggas, s yisental yemgaraden. Ma d uṭṭun-agi uzzig, ad d-yawi awal deg yal aḍris neɣ amagrad ɣef tudert d umẓawan n ucennay mucaɛen deg tmazɣa d umaḍal merra, wagi d Matub Lwennas. Yetturaǧu, ad yili deg ugbur n tesɣunt-a, tizrawin yettwaxdamen fell-as, tijmilin, isefra, tidiwwiniyin-is… Iḍrisen akk ara yilin deg-s, ad ilin ttwarun s tutlayt n tmaziɣt sɣur yiselmaden n tesdawit, isdawanen, imura d yimedyazen imaziɣen. Yal ameskar d acu n usentel neɣ n tesleḍt ara yexdem i tezlatin n uḥeddad n wawal, wa ɣef tmedyazt-is, wa ɣef timeɣnest-is wayeḍ ɣef tudert d yimuhal n unaẓur Matub Lwennas.

Ma ɣer taggara, ad d-nesmekti kan belli uṭṭun-agi uzzig n Matub Lwennas, d Mass Zidan Yasin i d-yellan ɣef lmendad-is. Yetturaǧu ad d-yeffeɣ udlis-agi sya ɣer taggara n useggas-agi ideg nella. Am wakken daɣen i yettuɛeggen, sya ar imir, ad yewjed wuṭṭun uzzig n tesɣunt-agi, ara d-yilin d tajmilt i umedyaz ameqqran Lewnis Ayt Mengellat, i d-yettheggay Mass Saɛid Cemmax. Ula d uṭṭun-agi wis 16, ad d-yawi ɣef ddeqs n temsal yerzan Docteur Honoris Causa n Lewnis Ayt Mengellat.

Adaoun Abdelghani

- PUBLICITÉ -