Accueil Tamazight Uccen d umeksa n Ẓayen d Kamal Ben Taḥa

Ajdid deg tira : Uccen d umeksa n Ẓayen d Kamal Ben Taḥa

143
- PUBLICITÉ -

Ass n, 12 tuber 2019, i d-yeffeɣ umaynut-nniḍen deg tira n tmaziɣt, d asurif ara imudden afud i tutlayt. Amaynut-a, ad ittuwelleh srid i warrac imecṭaḥ d yinelmaden n uɣerbaz, ladɣa wid yeqqaren tamaziɣt. Yis-s, ad ɛawnen iman-nsen, ad t-afen d tasalelt akken ad igerrez uswir-nsen ugar. D afaris i d-yeffɣen s usentel “Uccen d umeksa”, sɣur sin-a n yimeskaren ilan azal-nsen di tẓuri d yidles, s tallelt akken ad yemmed d leqdic yelhan. Acennay Ẓayen,yettwassnen s tezlatin-is icudden ɣer tgemmi, timetti tibuɣarin d yidles n teqbaylit, amaru Kamal Ben Taḥa i d-yessuffɣen yakan ddeqs n tefɣulin s tdiwennyin i yimecṭaḥ.

- PUBLICITÉ -

Adlis-a amaynut, ixulef wiyaḍ imi i d-yusa s talɣa n uzawag n wunuɣen (Bande dessinée) akked udiwenni gar yiɣersiwen s wunuɣen iwumi uɣalen yiniten igerrzen d tira s tmaziɣt sdat yal ameslay n uwadem seg udlis. Tikti, tettwakkes-d seg tezlit n Ẓayen “Uccen d umeksa” i d-yessuffeɣ deg yebrir 2015. Ar taggara n (la bande déssinée), ad naf yedda-d yiwnes ussid CD, d abaɣur acku deg-s ad nsel i tezlit n Ẓayen s ṣṣut icebḥen ara ijebden anelmad ad as-tehwu tmacahut. Ma d aḍris n tmacahut, yewwi-d ɣef “Yiwen umeksa n taddart, yessuffeɣ lmal-is am tannumi. Yerza-d fell-as wuccen, yečča-as tixsi, ameksa ur yetwelleh ara.

Mi faqqen wat taddart ixuṣ yiwen rruḥ, kkren ɣer uqelleb. Di lexla, ufan ala iɣsan i d-yeqqimen. Tennejmaɛ taddart, terra ṭṭlem ɣef umeksa, dɣa yettwaxeṭṭa”. D ayen i yeǧǧan anaẓur ad d-yessegri s wawal-a “A lḥeq anwa ara ak-yeffren, seḍher-d udem-ik ass-a, ad iban win ara ixellṣen, ma d uccen neɣ d ameksa”. I usmekti, afaris-a, yeffeɣ-d iḍelli 20 tuber deg tmurt n Fransa. I wid ara t-yaɣen ad t-ɣren u ad as-slen, taɣuri d tmesliwt yelhan i asen-nessaram.

Kh. A.

- PUBLICITÉ -