Ha-tt-an dima tmurt n Lezzayer gar tmura i yeṭṭfen imeḍqan imenza deg wayen yeɛnan ibaxixen n ubrid. Ɣef leḥsab n wulɣu n Ulemmas aɣelnaw n uḥezzeb d laman deg yibardan (CNPSR), i d d-yefkan igemmaḍ s waccu i d-glan ibaxixen n ubrid deg useggas n 2018, ad naf azal n 3 091 n lmuta, d 30 561 n yimejraḥ deg 21 568 n yibaxixen n ubrid i yettwajerden. Ɣef wakken i d-yenna unemhal n Ulemmas aɣelnaw n uḥezzeb d laman n yibardan, Mass Ahmed n Ait El Hocine, i d ihedren deg umaṭṭaf n Radyu taɣelnaw, yettkemil usubbu deg umḍan n lmuta seg yibaxixen n ubrid ma neserwes d umḍan n useggas n 2016 anda llan 4 500 n lmuta. Ma deg useggas 2017, ad naf 3 600 n lmuta. Yella-d, ihi, usubbu s wazal n 8,36 % deg umḍan n lmuta. Dɣa ɣef leḥsab n yimḍebber amezwaru n Ulemmas (CNPSR), ugar n 90% n yibaxixen n ubrid, ssebba-nsen d imdanen, ladɣa ayen i icudden ɣer uqadar n yilugan n tenhart iwatan. Ugar 25% nniḍen, yerza zyada deg uɣiwel n yimsebriden. Deg wawal-is, yenna d akken ugar n 45% n yibaxixen, xeddmen-ten yilmẓeyen yesɛan sddaw n 29 n yiseggasen deg leɛmer-nsen, anda ara naf 23,49 %, sɛan kan turagt n tenhart ur nɛeda ara sin (2) n yiseggasen. Ma d ayen yeɛnan ttawilat n usiweḍ meqqren d ikumya, d nutni i d-igellun s waṭas n lmuta deg yibaxixen n ubrid. Ɣef waya, dɣa, i teddem tenmehla n Ulemmas aɣelnaw n uḥezzeb d laman n yibardan, aṭas n leblanat akken ad tessiweḍ deg usenqes n twaɣiyin n yiberdan.
Ali Zalouk