Accueil Tamazight Ugar n 66% n wid irebḥen BAC i yettwaceggɛen ɣer ufran-nsen amezwaru

ASELMED UNNIG - Mbeɛd tallit n ujerred

Ugar n 66% n wid irebḥen BAC i yettwaceggɛen ɣer ufran-nsen amezwaru

30

Iberreḥ-d uneɣlaf n uselmed unnig akked unadi ussnan, Tayeb Bouzid, ass-nni n ssebt iɛeddan deg Lezzayer tamanaɣt belli 66,46% n wid irebḥen akayad n BAC n useggas-agi aɣurbiz 2018/2019, yekfan ajerred-nsen, ttwaɣden (ttwaceggɛen) ɣer ufran-nsen amezwaru.

Deg yiwen n usarag n tɣamsa i iga deg Uɣerbaz aɣelnaw unnig n tsenselkimt (informatique), Mass Bouzid yenna-d belli 261 171 ɣef 271 623 n wid irebḥen BAC, gan ajerred-nsen amezwaru deg internet, d atug yessawḍen ɣer 96,15%. Yerna, yenna-d uneɣlaf-a belli 173 585 n wid i d-yewwin BAC, ttwaɣdan ɣer ufran-nsen amezwaru, atug-is yewweḍ ɣer 66,46% seg umḍan amatu n wid yettwajerden. Ma 41 266, ruḥen ɣer ufran-nsen wis sin, atug-nsen yewweḍ ɣer 15,80%. Ma d 21 184 n wid irebḥen akayad-a, ruḥen ɣer ufran-nsen wis kraḍ, yewweḍ utug-is ɣer 8,11%, ɣer tama, 13 191 n wid i t-id-irebḥen ttwaceggɛen ɣer ufran-nsen wis ukkuẓ (afran aneggaru), ma d utug-is ɣer 5,05%.

Azal n 83 400 n yimeḍqan imaynuten i iwejden

Aneɣlaf uselmed unnig d unadi ussnan, Tayeb Bouzid, iberreḥ-d ass-nni n lexmis di Lezzayer tamanaɣt, belli tuɣalin tunṣibt i lmend n useggas asdawan 2019/2020, ad tili ass n lḥed, 15 cutember 2019. Ma d ajerred aneggaru, ara d-yilin deg yigezda d tesdawiyin uɣur ttwaceggɛen yisdawnen-agi imaynuten, ad yili seg 2 alamma d 8 cutember 2019. I kemmel, yenna-d belli aḥric-ines, yessewjed-d i lmend unekcum-agi asdawan i d-iteddun, azal n 83 400 n yimeḍqan isegmayen (pédagogiques) imaynuten, d ayen ara yessiwḍen tizemmar n 1 512 000 (amelyun d semmus n twinas mraw d sin) n yimukan di yakk aẓeṭṭa asdawan.

“Tizemmar-agi tisegmayanin d tid ara isurfen aqbal n wazal n umelyun d ṭam n twinas n yisdawaenˮ, i d-yenna uneɣlaf Bouzi, yellan yesselwi lecɣal n usarag aɣelnaw n tesdawiyin. Ma d ayen yerzan tizemmar usensi akk d wučči, aḥric-agi, ha-t-an ad d-yessewjed di tallit-agi i d-iteddun azal n “51 370 n wussuyen, ara yessiweḍen tizemmar usensi ɣer 658.600 n wussuyenˮ, i d-yenna uneɣlaf-a i d-yesfahmen belli, ayagi ad yettwebḍu s umtawa ɣef tesdawiyin merra n tmurt.
Gh. A.