Accueil Tamazight Ugin tuɣalin ɣer Makuda, bɣan ad qqimen di Wagennun

BUJIMEƐ Imezdaɣ mgal rray n Sonelgaz

Ugin tuɣalin ɣer Makuda, bɣan ad qqimen di Wagennun

151

Imezdaɣ n tuddar n tɣiwant n Bujimeɛ i ibeɛden s wazal n 30 n yikilumiṭren ɣef Tizi Uzzu, beggnen lɣiḍ-nsen ussan iɛddan, imi ugin ad qeblen rray i teddem tkebbanit n trisiti d lgaz n Tizi Uzzu. Yuɣ lḥal imezdaɣ n tɣiwant-agi, llan ttxellisen trisiti d lgaz di tnegga (agence) n Sonelgaz n Wagennun, ma d tura bɣan ad ten-rren ɣer tin i llin di Makuda. Dɣa deg wussan iɛeddan, nejmaɛent tuget n teseqquma n tudrin n tɣiwant-agi, msefhamen ɣef temsalt-agi n ubeddel n umkan n uxelles n trisiti d lgaz si Wagennun ɣer Makuda, i yugin s lqaɛ. Syin, gren-as tiɣri i unemhal n tkebbanit-agi n Sonaelgaz n Tizi Uzzu, ideg i d-nnan ala i ubeddel-agi.

Am wakken diɣ i ceggɛen tabrat anda i d-beggnen lɣiḍ-nen i uselway n tɣiwant n Bujimeɛ,  i unemhal n Tnegga n Sonelgaz n Wagennun. Gar ssebbat i yeǧǧan imezdaɣ-agi d teseqquma ad agint rray-agi, ad naf bedrent-d tamsalt n umutti n yimezdaɣ arma d Makuda, imi tebɛed ugar n Wagennun. Rnu ɣer-s, imi limmer d lebɣi  d aseqreb ara sqerben imezdaɣ ɣer tnedbalin mačči d asebɛed ara ten-sbeɛden fell-asent. Jebden diɣ tamsalt n yidrimen, imi imsaɣen ad xelsen ugar n wayen ttxelisen mi ara ruḥen ɣer Wagennun. Nnan-d diɣ belli, abeddel-agi ur yetteffeɣ ama ɣef yimezdaɣ ama ɣef tkebbanit-agi. Di taggara, ssuturen ad d-tili tuɣalin ɣer deffir di rray-agi i ṭṭfen i wakken ad yefru wugur-agi.

Adaoun Abdelghani