Accueil Tamazight Ugin yimawlan ad ɣren warrac

Iɣil Ɛli

Ugin yimawlan ad ɣren warrac

72

Taddart n At Sasi i d-yezgan di tɣiwant n Yiɣil Ɛli, taḍayṛa n Yiɣil Ɛli, seg tid yesεan ugur deg uɣerbaz amenzu n taddart-nsen. Aɣerbaz-a iwumi qqaṛen «Ameɣṛaṣ Sasi Muḥend Ṭaheṛ», d aqbuṛ nezzeh, kullec deg-s ilaq-as uqeεεed. Ama d tineɣriyin i yehrurin, yerna ttekcamen-tent-id waman deg cettwa, ama d taneččit, neɣ ula d abṛaḥ anda i tturaren warrac. D ayen i yeǧǧan ibabaten n warrac n taddart-a, xedmen anejmuε akked uselway n tddukkla n yibabaten n warrac ass n, sem 30 ɣuct iɛeddan, i wakken ad d-ffɣen s tifrat i ilaqen i wugur-a. Ad d-nesmekti d akken ur d-rzan ara waṭas n yibabaten, ɣas ma yella tamsalt teεna-ten akken ma llan.

Seld amciweṛ d umbeddal n tektiwin, ffɣen-d s ṛṛay d akken ad sḥebsen taɣuri n waṛṛac alamma rran-d yimasayen i teεna temsalt i tiɣṛi-nsen. Aredmani, ɣas ma yella ayagi yezmer ad iḍuṛ arraw-nsen, lameεna ɣer taggara, yewwi-d igumma-s. Ayagi imi i yerza uselway n tdayṛa n Yiɣil Ɛli ɣeṛ uɣerbaz-a, iwala liḥala-s. Dɣa yemsefham akked yibabaten akked yimezdaɣ belli ilaq ad d-yili ureqqeε n uɣerbaz-a, yerna s tazzla. Daymi i sḥebsen taɣuṛi n uswir n uheggi (crèche) deg wayyur amezwaru n tɣuṛi, i wakken ad mudden taneɣṛit-nni i warrac n uswir wis semmus, di leεḍil ad reqqεen taneɣṛit n yineggura-a.

Ibabaten n warrac d yimezdaɣ n taddart, umren ayendin imi yefra wugur-nsen. Dɣa yenna-aɣ-d yiwen seg taddart: «Akka tura, ad ɣren warrac-nneɣ di tɣellist, ula d nekni seg tama-nneɣ, ad netthenni fell-asen. Tanemmirt i yibabaten i ibedden am yiwen n urgaz i wakken ad d-nawi izerfan n warrac-nneɣ. Dɣa ad faṛseɣ tagnit i wid ur d-nusi, ad asen-iniɣ belli imal n dderya-nwen yebna ɣef ufus n tallelt ara asen-tefkem».

K. K.