Ɣas qrib aseggas segmi yeḥbes leqdic adelsan s taɣulin-is yakk, maca s tisin d umagger n yixef n useggas n yimaziɣen, ulamek ara zeglen Leqbayel d Yimaziɣen asiher ameqqran am Yennayer. D aneḍruy i d-yettuɣalen s tumert yal aseggas, d win i ggaren iɣallen Yimaziɣen s tuɣalin ɣer laṣel d ucuddu deg tnekkit. D annect-a i yeǧǧan ula d inelmaden d yiselmaden, imasayen d yinemhalen n yiɣerbazen s kraḍ n yiswiren, ad gen leqdicat yemxalafen ɣef teɣzi n yimalas, ladɣa segmi i d-tceyyeɛ teɣlift n usedwel ulɣu i wakken ad d-yili usfuggel n uneḍruy-a.
Nwala-d ama deg yizeḍwa inmettiyen, ama di kra n tiliẓriyin, leqdicat idelsanen i d-yellan i lmend n waya ; d ccna, d amezgun, isefra, inzan, tiwin d usenɛet n tɣawsiwin tiqburin i icudden ɣer wansayen n lejdud, tuččit yemgaraden i d-yersen deg yimraḥen n yiɣerbazen, talusi n tqendyar d teksiwin i teqcicin d yiqeccabiyen d yibrenyas i warrac. Ayen i as-yernan deg wazal i Yennayer deg uɣerbaz, d akken iselmaden ur ttun ara tigin n temsirin n umezruy n yennayer, d usefhem i yinelmaden anamek d tmentilt d wacu uɣur icudd umenzu n yennayer, akken ur yettɣimi ara di ccḍeh kan d ccna, neɣ s unamek-nniḍen s wudem afulkluri.
Ɣas ma yella yennayer n useggas-a, ur kkint ara deg-s s tuget tddukkliwin tidelsanin ɣef tmentilt n waṭṭan i d-yersen, maca llan-d wahilen ɣas d imecṭaḥ sya u sya, am tigin n usebdad ameqqran n ugellid Cacnaq di temdint n Tizi Uzzu, d win i mmugren yimezdaɣ n tmurt n leqbayel s lferḥ, s tirza-nsen ɣer umkan d tuṭṭfa n tugniwin ɣer tama-s. D ayen i d-yessebganen azal n uneḍruy yecban Yennayer, i yettwasfuggulen deg yiseggasen-a ineggura deg merra tamiwin n tmurt n Lezzayer akked tmura n Tefriqt Ugafa d tmura n lberrani, i usuffeɣ n yidles amaziɣ, i yellan d aqdim n lqedma, ɣer umaḍal.
Khaled Achoui