Accueil Tamazight Ula d arubu d anaẓur ?

Tgelda Yedduklen (Royaume-Uni)

Ula d arubu d anaẓur ?

85

Ayen walan yimdanen deg temsikkent i yekfan 6 yulyu-a, di Oxford, tamurt n Tgelda Yedduklen (Royaume-Uni), ixulef aṭas ayen nnumen ttafen. Deg tefsarin-a dɣa, rsen-d kra n yiqeddicen n tẓuri – taklut, unuɣen d tneqcin – mačči d afus n umdan i ten-igan, wanag d wid n umdanwayd, neɣ n urubu s ssifa n tewtemt. Tarubut-a, yesnulfa-tt-id Aidan Meller, yefka-as isem n Ai-Da, ɣef yisem n tmussnawt di tsenselkimt Ada Lovelace.

Di temsikkent-a, tban-d trubut-a d tanaẓurt i d-igan ayendin d tiɣawsiwin icebḥen. S tebluzt d tamellalt, tesnubgut temdanwayt-a inebgawen d yinerzafen, rnu tettluɛa-ten s kra n tefyar i as-sihlen si tazwara. Ayen yerzan tarrayt n uqeddic n Ai-Da, ad tmuqel send ayen yellan sdat-s s tallelt n tkamiratin yeffren deg wallen-is, syin, tigzi tamacinant i as-yettwaskecmen ad d-teṭṭef tugna akken ad tsuneḍ i iɣil-is ad yebdu asuneɣ.

Din ara tebdu ihi asuneɣ s uɣanib (crayon), s yimru neɣ s tpansut. ɣef wawal n wid yessnen Ai-Da, ur yezmir akk yiwen ad ihendez (prévoir) si tazwara d acu ara d-texdem, rnu yiwen seg yisnulfuyen-is ur yettcabi wayeḍ. Ulamma qqaren-d tizemmar-is n usnulfu ar tura sɛant tilas, acku tenǧem kan ad tsuneɣ neɣ ad tesbeɣ. Ma yella d tineqcin, ilaq ad tt-yallel umdan i iɛerrḍen ad d-yexdem ayen i d-tsugem.

Tura akka, aṭas i yettmesteqsayen ma yella Ai-Da d tanaẓurt ? Daɣen, i wanwa uɣur ara d-teggri tedrimt n yiqeddicen-is yenzan? Abeɛda ma neḥsa d akken deg 2018, isenz uxxam n uznuzu Christie’s yiwen n uqeddic n tẓuri, i d-yesnulfa ulguritm, s wazal n 450 000 n yiyuruten.
M. K.