I tikkelt tamezwarut, seld 15 n yiseggasen-aya ɣer deffir, ur d-tettili ara tfaska d tmeɣra n yennayer deg temdint n Wehran i useggas amaynut n Yimaziɣen 2971. D tafaska tameqqrant i tennum Tddukkla Tadelsant Numidya tesfuggul-itt yal aseggas, ɣef teɣzi n yimalas. Maca aseggas-a imi d-yusa waṭṭan n covid-19 am yir inebgi ɣef umaḍal merra aseggas-a, yesseḥbes kra yellan d timlilit n yidles, yerra abernus aberkan fell-as, ḥebsent tfaskiwin, sebken yisaragen, yers-d wagu ɣef yidles. Ɣef waya, berrḥen-d yiɛeggalen n Tddukkla Numidya deg usebter-nsen n facebook, nnan-d “S usḥissef, ad aɣ-ssurfen yimeddukkal, wid yuɣen tannumi ttekkin yid-neɣ deg tfaska n yennayer yal aseggas, imi aseggas-a ur nezmir ara ad nili di ttiɛad am yal tikkelt.
Nessaram bxir akk i tellam, i tellamt”. D tafaska i d-yessemliliyen ddeqs n leqbayel n temnaḍt-a n Wehran, ttasen-d aṭas n yinebgawen seg tmurt n leqbayel, ama i tẓuri (d imedyazen, d icennayen neɣ d imyura), ama i temsikent (yal wa acu n taɣult uɣur icudd). Aseggas-a, ad yettwazgel usiher-a, acku mačči deg ufus n umdan i d-teqqim, d aṭṭan amcum i yesḥebsen kra yellan d taɣult, ɣas akka tineggura-a tebda tettuɣal tudert akken tella. Nessaram ad yekfu lhemm s tɣawla, ad yuɣal yalci s amkan-is. I usmekti, ula deg wahil n uɣerbaz, yal 12 janvier n yal aseggas, tettceggiɛ Teɣlift n usedwel aɣelnaw ulɣuyen i yiɣerbazen, akken ad d-yili usfuggel d umagger n yixef n useggas n Yimaziɣen s wudem unṣib deg tsuddwin merra n usedwel, maca ar tura ur d-iban ara ma ad d-yili waya deg wussan i d-itteddun, neɣ xaṭi.
Xerṣum ma yettwazgel aseggas-a deg yiɣerbazen neɣ deg tdukkliwin, ad t-id-smektin leqbayel ama deg yixxamen, ama deg yizeḍwa inmettiyen s yisaragen d tugniwin icebḥen, ama s tira n yiḍrisen ɣef yennayer, ama s tiɣin n yidlisen n tmaziɣt di temkerḍiyin sɣur yal yiwen, akken ad d-yili usfuggel n yennayer s wudem-nniḍen, udem adelsan ussnan.
Khaled Achoui