Accueil Tamazight “Ur tebɛid ara tẓuri fell-i”

MOE GUETTAF, d acennay, d amyaru : “Ur tebɛid ara tẓuri fell-i”

126
- PUBLICITÉ -

Deg tdiwennit-agi, newwi-d awal akked unaẓur MOE ɣef umecwaris deg yal aḥric n tẓuri. S lferḥ i aɣ-d-yerra ɣef yisteqsiyen i asnefka.

- PUBLICITÉ -

Aɣmis n yimaziɣen: Isem-inek Muḥend, meɛna tefkiḍ isem n tẓuri i yi-iman-ik, MOE. Ansi akka i d-yekka ma mačči d lbeḍna ?

Moe Guettaf : D isem-iw acku s tewzel, win i yi-d-yeɣran s yisem-agi i tikkelt tamezwarut d yiwen umeddakkel-iw Nassim.H, yeqqen ɣer yiwen n wunuɣ yettembiwilen (dessin animé) muccaɛen di ddunit « les Simpsons ».

Anda nerra ad ak-naf, di ccna, di tsekla, deg wunuɣ (dessin), tesdukleḍ-tent akk. Ansi i ak-d-tekka tiɛubbja-agi ?

Tiɛubbja, wwiɣ-tt-id mebla ccek ɣer sin n yimawlan-iw imi di sin ttarun, u baba daɣen, iɣsan-is di rreḥma, yella icennu. Yura kra n tceqqufin n umezgun timectah… Yerna ufiɣ-d tagiṭart deg uxxam… idlisen, ur tebɛid ara tẓuri fell-i.

Tessufɣeḍ adlis deg useggas n 2013, dɣa seg wass-n ur d-terniḍ ara. Ayen akka ?

Kra bɣiɣ ad xedmeɣ ayen yelhan ugar n udlis amenzu, si tama n teɣzi n udlis bɣiɣ ad rnuɣ tikelt-agi adlis meqqren ciṭuḥ. Daɣen simmal ttnadiɣ ad yili udlis amaynut, d win ara yi-d-yerren kra n lfayda.

Tesneḍ i wawal, tesneḍ i wunuɣen, ur txemmemeḍ ara kra n wass ad dtheggid tisfifin n wunuɣen (Bande Dessinée) imi annar-agi d ilem ?

Di ṣṣenf n wunuɣen, xedmeɣ la caricature. Tasfift n wunuɣen, mazal ur xdimeɣ ara kra. Acu, bɣiɣ ad xedmeɣ unuɣen yettembiwilen (le dessin animé), ugar n tesfifin n wunuɣen.

Ma nezzi-d ɣer ccna, deg uḍebsi-inek « Tizenqatin », tella tezlit « Eliza », turiḍ-tt acḥal n yiseggasen-ayagi, snen-tt aṭas n yimdanen, tḥekku-d ayen yettidir ugdud ass-a, anda nettwali ilmeẓyen ttwaḥbasen di lbaṭel. Moe d-acennay yettwalin ɣer sdat ?

Ayen i iḍerrun di Lezzayer ass-a, d ayen i d-yeḍran di tmura « Le tiers monde » yakan, ladɣa di Marikan talatinit. Asmi i uriɣ tizlit-agi, uriɣ-tt ɣef yiwen n usentel « Universel ». Tilelli ass-a nemmuger-d ayen i ɣef uriɣ, ahat, di 2007. Llant tezlatin i uriɣ, xas ur d-ffiɣent ara, send tagrawla-agi, acku ḥekkunt-d ayen iḍerrun ass-a. Ihi amzun ttwaliɣ ɣer sdat ( s teḍṣa).

Tizlit « Bella ciao » yettwasnen deg umaḍal meṛṛa, tecniḍ-tt akken tella, akken i tt-yecna yakan Ucennay Ferḥat. Ur txemmemeḍ ara, kečč, ad tt-id-terreḍ ɣer teqbaylit ?

Hemmleɣ aṭas tutlayin n wagerakal. Ma ccniɣ-d s tegrigit neɣ s tṭelyanit ur ttḥulfuɣ ara baɛdent fell-i, simmal ttisineɣ deg-sent, ttafeɣ-d ayen i yezdin timura n wagerakal.

Moe, nezmer ad d-nini d acennay amḥaddi ? Mebla ccek.

D acu i d isenfaren-inek sya ɣer sdat ? Sewwjadeɣ sin n les Clips i snat n tezlatin deg udebsi-inu amenzu, Tizenqatin. Yiwet n tejmilt i ucennay Brahim IZRI s ṣṣenf n la techno akked yiwen n udlis i warrac imecṭaḥ, ad yeddu deg-s uḍebsi n tezlatin daɣen i warrac imecṭaḥ.

Ahat tebɣiḍ ad d-ternuḍ awal uqbel ad nessali tadiwennit-agi ? Tanemmirt ɣef temlilit-agi, d tagnit akken nniɣ-d ayen bɣiɣ ɣef ubrid amecṭuḥ i d-wwiɣ di tẓuri. Ssarameɣ aṭas n tebɣest i yal win ibenun tiqenṭar gar yinaẓuren d tmetti.

Yesteqsa-t Fahim Messaoudène

- PUBLICITÉ -