Taɣiwant n At Yahia Moussa i d-yezgan deg unẓul n ugerzu n Tizi Uzzu, yesεan ugar n xamsa uεcerin alef n yimezdaɣ (25 000), ur d-sfaydi ara acḥal d aseggas-aya ula seg yiwen wahil n yisenfaren n lebni n tnezduɣin. Xas ma taɣiwant tettwaxelq-d deg useggas n 1971, ur d-sfaydi ara ala s 100 n tnezduɣin kan. D amḍan meẓziyen nezzah ma nesmers d umḍan n yimezdaɣ n temḍiqt-agi. Dɣa, ula d aɣbel n wakan n lebni yetabaεen ɣer Uwanak, yezga d aɣbel agejdan n unegmu n tɣiwant n At Yaḥya Mussa. Yiwen imeḍbber n teseqqamut n tudrin n tɣiwant, yerkeb-it lɣiḍ meqqren seg ugdal n wahilen n lebni n tnezduɣin deg tɣiwant-agi, dɣa yenna-d : « D ssebba kan, i d-ttafen, yal tikelt, yiεeggalen n useqqamu aɣerfan aɣiwan s wagḍal n wakal-agi n lebni n uwanak. Ssutren yimḍebbren n tɣiwant deg yimḍebbren n tenmehla n useḥbiber n ṭzegwa, s tukci n kra n yimeḍqan n wakal iwatan i lebni i tɣiwant, maca ar tura ur d-yettunefk ara wakal-agi. Ala imeḍqan anda ttwabnan n yinidan, yecban ; Axxam n tɣiwant, aɣerbaz alemmas d tesnawit n tɣiwant ». Deg yiwet n teswiεt anda yettnerni usuter n tnezduɣin deg tɣiwant, anda ara naf ugar n sbaεmya (700) n yikaramen n usuter n tnezduɣin i ssersen yimezdaɣ deg srabes n tnezduɣin n tɣiwant. Dɣa, akken yesḥassef yiwen n uεeggal n useqqamu aɣiwan, i d-yennan : « Ɣas ma neḥsa s taluft-agi n ugḍal n wahilen n tnezduɣin d umḍan meqqren n usuter n tnezduɣin, maca ur nesεi ara yakk tifrat, d wayen ad nefk i yemsutren». Dima deg yiwen udiwenni d yimḍebbren n tɣiwant-agi, uɣalen-d s wawal ɣef yiɣeblan i d-ttmagaren yimezdaɣ d tallelt i d-yetmuddu uwanak i lebni deg tudrin, anda ara naf d akken mačči tuget n yimdanen i izemren ad bnun i yimanen-sen, ladɣa imeɣban. Dɣa,ssuturen dima yimḍebbren deg tenmehla n useḥbiber n tẓegwa, ad d-rren kra n yimeḍqan n wakal n lebni i tɣiwant akken ad d-awin amur seg wahil n lebni n tnezduɣin n ugerzu. Tamazdayt n teseqquma n tudrin n tɣiwant seg yidi-is, tessuter deg yimḍebbren teεna temsalt i tukci n wakal-agi yetabaεen ɣer tenmehla n useḥbiber n ṭzegwa ɣer tɣiwant. Ssutren deg yimḍebber amezwaru n ugerzu n Tizi Uzzu s tukci n umur ameqran n tallelt n lebni amagam, akken ad d-yesfaydi umur ameqqren n yimezdaɣ seg taggayt-agi n tnezduɣin. Ad d-nesmekti kan d akken taɣiwant, tesfaydi-d seg tlatin (30) n tnezduɣin deg wahil n teksa n tnezduɣin yeffɣen i usaḍuf, neɣ tidak izelgen udmawen n temdinin.
Ali Zalouk