Accueil Tamazight Ur ttwaqenɛen ara yiselmaden s tneqqiḍin i ...

ASEDWEL AƔELNAW - Timlilit gar yigensasen n yiselmaden-taneɣlaft n usegmi

Ur ttwaqenɛen ara yiselmaden s tneqqiḍin i d-yeffɣen

47

Mazal ṭṭfen yiselmaden n uɣerbaz amenzu deg waṭas n tamiwin n tmurt di rray i ddmen ussan iɛeddan s usunded i bdan ugar n waggur-aya, anda refden aṭas n yisuturen yerzan asenqes n leḥris i d-yersen fell-asen deg uswir-a adda n uselmed, d useɛdel-nsen deg tfesna akked yiswiren-nniḍen. Ɣeṣben tigawin sin-a n yimalasen ineggura, imi kemmlen asunded ɣef teɣzi n kraḍ n wussan deg yimalas, arim, aram d ahad, akken daɣen i tugi taggayt meqqren deg-sen ad gen ikayaden n ukraḍyur amezwaru yebdan seg tazwara n duǧember, neɣ s unamek-nniḍen d timerna n useḥres ɣef teɣlift akken ad d-terr i tiɣri.

Dɣa, Taɣlift n usedwel, ɣas akken aṭas i tsewɛed s tugdi n usenqes deg tcehrit-nsen d ustixer-nsen ma kemmlen deg usunded, terra-tt tmara ad d-tsel i yisuturen n yiselmaden-a, imi testeqbel ass n 4 duǧember kra n yigensasen i irefden tiɣri n yiselmaden, anda i d-ffɣen s tsemlilt deg-s kksen-asen aheggi n tfertin n temsirin, akken daɣen i ten-tewɛed ad teddem isuturen-nniḍen s wudem n tidet. Maca tineqqiḍin-a i swayes i d-teffeɣ temlilit-agi, ur ɛǧibent ara tuget n yiselmaden yesɣarayen deg uswir-agi amenzu: walan-tent amzun d astehzi sɣur teɣlift neɣ d asenqes deg wazal-nsen, acku ulac aṭas n ubeddel i d-yellan ma nesserwes amek llan sselmaden zik d wayen i asen-d-terna d amaynut, ladɣa mi ẓran belli asuter-nni agejdan n useɛdel n tfesna gar yiswiren merra n uɣerbaz d awezɣi, ɛlaḥsab n umselay n teɣlift.

D ayen i ten-yeǧǧan ad bɣun ad kemmlen asunded-nsen war aḥbas alamma terra-d i tiɣri-nsen s yakk tineqqiḍin-is. Acu kan imi tekcem tmurt deg teswiɛt n lḥers imalas-agi s wayen yakk i d-glant tefranin i d-tessuddes tmurt n Lezzayer i yugi uḥric meqqren n yizzayriyen, dɣa iselmaden-a ḥebsen asunded, uɣalen ɣer tneɣriyin war ugur. Maca yella-d wawal d akken ad uɣalen ɣer tigawt deg wussan-a kan i d-iteddun, akken daɣen ara refden isuturen s wudem aḥeqqani akken kan ara d-uɣalen seld imuras imenza n tegrest, ad gen leḥris ɣef wid terza temsalt alamma wwin-d azref-nsen.

Kh. A.