Accueil Tamazight Ur yettunefk ara warraz n Tzemmurt n wureɣ i usaru ɣezzifen

TIZI UZZU Taggara n tezrigt tis 17 n Tfaska taɣelnawt n usaru amaziɣ

Ur yettunefk ara warraz n Tzemmurt n wureɣ i usaru ɣezzifen

36

I tikkelt tis snat ɣef usref, ur yettunefk ara warraz n Tzemmurt n wureɣ n usaru aɣezzfan deg Tfaska tadelsant taɣelnawt taseggasant n usaru amaziɣ i yessulin amahil-is ass-nni n letniyen, 04-03-2019, deg Uxxam n yidles n Mulud Mɛemmeri n Tizi Uzzu. Ass-nni n letnayen yezrin, ɣef 15h00 n tmeddit, i medlent tewwura n tezrigt tis 17 n tfaska taɣelnawt n usaru amaziɣ, i d-yellan deg Uxxam n yidles Mulud Mɛemmeri, d tajmilt i ucennay Ǧamal Ɛellam d Yusef Gusem, yellan d yiwen gar wid i d-isbedden tafaska-a.

D tafaska i d-yeḍran deg Tizi Uzzu gar 28 fura d 04 meɣres-agi ideg nella. Mbeɛd tlata wussan n temsizzelt, tewweḍ-d tesfugla n taggara i iɛeddan deg tegnatin igerrzen. Yella-d deg wahil n tesfugla-agi, ufraq n warrazen n Tzemmurt n wureɣ i yisura d yisebgaren i d-yufraren, deg tewsit n umalay neɣ n wunti. Yella-d diɣ leqdic adelsan s wazal-is, gar ccna d wayen-nniḍen.

Am wakken daɣen i d-yella umeslay sɣur Mass Amar Tribec s yisem-is d imḍebber amezwaru ɣef tfaska-a, yenna-d belli : “Asaru amaziɣ yennerna s waṭas, ama deg tɣara neɣ deg tesmekta”. Syin d Massa Gumeẓyan Nabila s yisem-is d tanemhalt n yidles n lwilaya, i d-ixedmen taḥawact ɣef tezrigt-agi, d uheggi i tezrigt i d-iteddun. Am useggas iɛeddan, ur yettunefk ara warraz n Tzemmurt n wureɣ deg ssenf n yisura ɣezzifen, imi ɛlaḥsab n yiɛeggalen n teseqqamut n uktazal, rebɛa-nni yisura ittekkan deg temsizzelt-a deg tewsit n usaru aɣezzfan, ur wwiḍen ara ɣer uswir meqqren n yisura ɣezzifen neɣ s wawal-nniḍen, ur qqudren ara yimseḍruyen n yisura-a ilugan imaḍlanen neɣ igraɣlanen n ssinima.

D acu kan, tefka teseqqamut n ufran abdar uzzig (la mention spéciale) i usaru « Tamacahut n Selyuna » n Aziz Helmouni. Tukci n ubdar-a, iswi-nnes d asebɣes n yilemẓiyen akken ad kemmlen asirem d ufares deg uḥric-agi n ssinima amaziɣ, ɣef wakken i t-id-yenna Mass Ɛulmi Saɛid.

Ma deg ssenf n yisura iwezzlanen, Tazemmurt n Wureɣ yewwi-tt usaru « Win Ireɣɣen neɣ Celui qui brûle» n umseḍru Sliman Bunya. Am wakken daɣen arraz n Tzemmurt n wureɣ di ssenf n yisura n usider (documentaire) i sin n yisura-agi : « Yuba Wis Sin » n Mokrane Ait Saada ɣer yidis n usaru « JSK, Asmi ay Terbeḥ » n Abderazak Larbi Cherif. Ddima deg taggayt n usaru n uisider, tefka daɣ tesmilt n yimgillan (jury) abdar uzzig i usaru n « Assefrek n Yiḍumman deg Buzeggan » n Ǧamel Baca ay d-yesseknen amek ay la ferrnen yimezdaɣen n yiɣerman n Buzeggan (Tizi Uzzu).

Deg wayen yerzan asaru n tkaḍuft (animation), d asaru « Iɣallen yeddukklen » n Rabeḥ Ḥeṭṭabi i yewwin Tazemmurt n wureɣ. Ma d asaru n « Issegmi n Tayri » n Lewnas Meǧnaḥ yewwi arraz n uferriɣ (asugen) yufraren, i yefren uzayez ɣef teɣzi n temsizzelt. Tazemmurt n wureɣ i usebgar neɣ n win i d-yuraren ddur urgaz ifazzen, yewwi-tt Mass Nasim Xelladi, yuraren deg usaru “Le rival” akked Mass Hakim Dilem, yuraren deg usaru “Le choc”.

Ma d arraz “Tazemmurt n wureɣ i tsebgart” neɣ tin i d-yuraren ddur n tmeṭṭut ifazzen, yuɣal i Massa Ḥusini Feṭṭa, yuraren deg usaru “Isegmi n tayri”. Ɣer taggara, ad d-nesmekti belli tafaska-a, ttekkan deg-s 23 n yisura seg taggayin yemgaraden yernu yessuli-itt umaray amatu n uɣlif n yidles, Mass Samir Ulebsir, i d-yennan belli mazal ad ikemmel uɣlif n yidles ad iɛiwen tafaska-a, am wakken yella lḥal daɣ di tfaskiwin-nniḍen yecban tin n Ɛennaba, tin n Wehṛan d tin n Lezzayer.

Adaoun Abdelghani.