Accueil Tamazight Ussan n usileɣ i lfayda n tddukkliwin

IXELWIYEN - Aseḥbiber ɣef twennaḍt

Ussan n usileɣ i lfayda n tddukkliwin

13

Tuɣal-d tddukkla tadelsant “Itri Uzekka” n taddart n Yixelwiyen di tɣiwant n At Ɛissa Mimun, ɣer leqdic adelsan mbeɛd mi gersen leqdicat-is i kra n wagguren. Ussan-agi ineggura, gren-d tikti d tamaynut, yeffɣen i wahil-nsen adelsan n useggas, gar tejmilin, timsizzliyin, tifugliwin…atg. Ulamma, aẓar n tikti yuɣ amkan gar yiswiyen n tddukkla-a, maca armi d tikkelt-agi i ssawḍen ad tt-ṛessin deg unnar. Dɣa, i lmend n ukraḍyur wis ukkuẓ n useggas-agi n 2019, thegga-d tddukkla-a ahil meqqren n usileɣ n yiɛeggalen n umussu aduklan.

Yetturaǧu ad d-ilint temliliyin-agi n usileɣ deg rebɛa n taɣulin yemxalafen, gar tuber, unbir akked duǧember. Asileɣ amenzu, ara d-yilin ɣef usbeddi n usenfar aduklan, ad d-yili ussan n 04 d 05 deg waggur-a n tuber i d-teddun. D aduktur Cennan Areẓqi, aselmad n tesdawit n Tizi Uzzu, ara d-yilin ɣef lmendad n usileɣ-agi n yiɛeggalen n waṭas n tddukkliwin tidelsanin. D netta diɣ, ara yilin d imsileɣ n usileɣ wis sin, ara d-yilin ɣef useḥbiber ɣef twennaḍt. Asileɣ-agi n sin wussan 14 d 15 unbir 2019, ad yezzi wawal deg-s ɣef usentel-agi: “Asegmi n twennaḍt, i lmend n unegmu idumen”, ideg ara d-yefk Mass Cennan iwellihen d wamek i ilaq ad nseḥbiber ɣef ugama ideg nettidir.

Mi yessuli usileɣ-agi, yetturaǧu ad tili tuffɣa s annar, ara d-yilin ɣer tkebbanit n usefreg n yiḍuman “Aluverplast”, i d-yezgan deg Tala Ɛetman. Ma d asileɣ wis kraḍ, ad d-yili ussan n 01 d 02 duǧamber 2019. Tikkelt-agi, ad yili usileɣ n umussu aduklan ɣef umnir n tikli deg udrar (randonnées). D Mass Lewnis Touati, d aɛeggal n tddukkla n twennaḍt Guraya, ara d-yilin ɣef lmendad n usileɣ-agi. Am wakken diɣ, i yetturaǧu ad d-tili tuffɣa s adrar deffir kan n usileɣ-agi, i wakken ad d-yili usnas deg unnar n wayen xedmen deg usileɣ-a n sin wussan. Asileɣ aneggaru, ad yili d asuffeɣ n tanant n tsellak timenza (secourisme), ara yeddun ɣef tegzi n waggur.

Ad tebdu ass n 15 unbir, ad tessali ass n 15 duǧember 2019. D Mass Ali Xeddam, imsileɣ aɣelnaw n tsellak timenza u d aselway n Waggur azeggaɣ azzayri n tama-a n At Ɛisa Mimun. D netta, ara yilin d imsileɣ n tanant-agi n secourisme. Ɣer taggara, ad d-nesmekti belli d axxam n yilmeẓyen Dib Ali n At Ɛisa Mimun ideg ara d-ilint temliliyin-agi n usileɣ. D tiddukkliwin tidelsanin n tɣiwant-a ɣer tama n tiyaḍ, i yetturaǧun ad sfaydint seg usileɣ-agi. Am wakken diɣen i zemren ad jerden yimdanen-nniḍen iman-nsen i wakken ad ttekkin. I wugar n yisallen ad siwlen ɣer wuṭṭun-a: 0775 98 92 03.

Adaoun Abdelghani