Win ur nesεi adrim di tmetti meskin d ameḥquṛ, ɣas ad t-tafeḍ d bu tidet. Ma d win yesεan ad t-ttṣeyyiḍen ɣas ad yili d akeddab. Dɣa ḥekkun-d yiwet n teqsiḍt, Macahu tellemcahu, ad tt-yeḍbeε Ṛebbi d asaru. Kra n yiminigen, kran taxxamt di Fransa, ttnusun deg-s. Ihi, yella yiwen gar-asen am wakka, d igellil ama n usurdi, ama n tezmert neɣ ad d-nini d ameḥquṛ i mi ayen d-yenna, ur yettεeddi ara, d ḍḍaεif. Yiwet n tikkelt, s nniya-s, yenna-asen: “Annaɣ ay irfiqen, laεca teḍra-yi!”. Nnan-as : “D acu daɣen ara d-teskureḍ?”. Yenna-asen : “Ala mačči, yiwen n uɣerda, yexdeε-yi deg usebbaḍ, welleh ar yečča yakk lḥafer-is, yerna ala win-ay isεiɣ”.
Nnan-as: “Susem, susem ula d lkedb-ik ur yenṭiq. Aɣerda, ad yečč lḥafer n usebbaḍ! Imi d ameɣbun, awal-is ur εziz ara, ittusemma am wakken d awezɣi i d-yenna, deg ul-is yefhem kulci. Yerra-tt ɣer daxel isbeṛ. Ddan wussan, inuda-d zzehṛ-is wissen amek. Yurar aṭyirsi, yerbeḥ adrim aṭas. Yuɣal d netta yakk i d amerkanti gar yirfiqen-is, yuɣ lqahwa, tumubil…Yuɣal mačči d win akken meskin ur d-nkeffu awal. Yiwet n tikkelt, iruḥ ɣer yiṛfiqen-nni-ines, yeεṛed-iten-id ɣer lqahwa-s, ussan-d s lferḥ d usqizzeb, bdan ttqessiren. Yenṭeq, yenna-asen: “Annaɣ ay irfiqen”. Nnan-as: “D acu?
-Leεca teḍra-yi lmuεǧiba.
-D lxiṛ?
-Yiwen uɣerda, yečča-yi tafdist, ttuɣ-tt di lḥara. Yegla ula s wuzzal-is. Welleh ar wehmeɣ, d acu-ten akka yiɣerdayen-agi ara d-ittnulfun.
-Welleh ar d ṣṣeḥ a-ten-an kra n yiɣerdayen zemren i kullec. Tumnen yeεni aɣerda ad iseftutes uzzal?
-I tura d kečč i d-yennan, daɣen ad ak-neskiddeb!
I wasmi i awen-d-nniɣ belli aɣerda yečča-yi asebbaḍ, ayɣer ur tuminem ara?
Sussmen, fehmen tamsalt. Yenna-asen: “Kunwi mačči d-iḥeqqaniyen, tleḥḥum am yizerman ɣef uεebbuḍ».
Yahia Yanes