Teḍra-d tasebḥit n wass n, 22 yebrir iɛeddan, yiwet n twaɣit n ubrid d tageɛmirt i yeglan s 6 terwiḥiwin, tesseggra-d s 7 n yimejraḥ. Yettwajerred waya deg ubrid aɣelnaw wis 26, mi myeẓdamen sin n yikerrusen deg umḍiq iwumi ssawalen « Leɛzib », i yettabaɛen taɣiwant d tdayra n Ccmini. Ɣef wawal n Uḥuddu aɣarim n Bgayet, i aɣ-d-yuznen ulɣu ass n tedyant gedged, mwaten gar-asen yiwen n usimi akked ukerrus-nniḍen s yisem n Toyota Hilux.
Dɣa, armi d ddurt iɛeddan, yewweḍ leḥsab n wid i tent-yuɣen ɣer 6 n yimattanen i yesɛan gar 18 d 42 n yiseggasen, d 7 n yimejraḥ seg tɣiwant n Msisna, i yesɛan gar 21 d 46 n yiseggasen. Akken kan leḥqen yirgazen n Uḥuddu aɣarim ɣer wadeg n usehwu-a, sawḍen s tazzla imejraḥ imuḍiren ɣer sbiṭar n Sidi Ɛic. Ma yella d tifekkiwin yesmiḍen, ttwawint ɣer texxamt n yimattanen n sbiṭar-a daɣen. Seg tama n leḥsabat n yisehwa n ubrid, seg umenzu n wayyur n yennayer ar 22 deg yebrir 2019 ɣef 10:00, ad d-nselɣu d akken ḍran-d 476 n yisehwa, s 565 n yimejraḥ d 17 n yimattanen.
Am yal tikkelt, yezga yettwessi Uḥuddu aɣarim inehharen akken mačči kan ad ilin d iḥezzaben deg ubrid, maca daɣen d imasayen n tɣellist-nsen d tin n wiyaḍ. D aya kan i izemren ad d-yawi ugar n talwit deg yiberdan. Ad d-nesmekti d akken seld tawaɣit-a tageɛmirt, iɛezza Useqqamu aɣerfan awilay n Bgayet (APW) akk tiwaculin n wid yemmuten, deg yiwen n yizen i asent-ibudd.
M. K.