Accueil Tamazight Yebda ujerred n yinelmaden ara yesɛeddin ikayaden

Taɣlift n usedwel aɣelnaw : Yebda ujerred n yinelmaden ara yesɛeddin ikayaden

59
- PUBLICITÉ -

Tberreḥ-d Teɣlift n usedwel aɣelnaw s beddu n ujerred n yinelmaden ara yesɛeddin ikayaden n taggara n useggas deg kraḍ n yiswiren yemxalafen, ama d inelmaden ara yesɛeddin akayad n taggara n ulmud amezwaru, ama d wid n uɣerbaz alemmas (akayad BEM) neɣ d wid n tesnawit (akayad n BAC). Yebda ujerred seg wass n 22 tuber yezrin, yerna ad d-yili s talɣa tamaynut deg yiɣerbazen. Acu kan tikkelt-a, d inemhalen n yiɣerbazen ara yestkelfen s ccɣel-a, akken ur d-ttilin ara yigulen deg yismawen d yizmaz n tlallit n yinelmaden.

- PUBLICITÉ -

Ma d ass aneggaru n ujerred, iwekked-d uneɣlaf n usegmi belli ad d-yili ass n, 10 unbir 2019. Imreccḥen ilelliyen n yikayaden n BEM akked BAC, ajerred-nsen ad yemgarad ɣef wid yeqqaren deg uɣerbaz, ad yili gar 22 tuber ar 21 unbir i d-iteddun deg tansa n umaris aɣelnaw n yikayaden (onec.dz). Ma d tamentilt i yeǧǧan taɣlift n usedwel ad terr leqdic-a i yinemhalen u ad d-yili s ttawil n internet, ad naf rbeḥ n wakud. Am wakken daɣen ara skecmen ttawil-a n internet deg leqdic n ujerred ɣer tsudduyin n usedwel s kra kra, akken ara tuɣal ad tettusemres talɣa-a s wudem akemmali sya d asawen.

Seg tama-nniḍen, tefka-d Teɣlift n usedwel izmaz n wussan n yimuras n useggas aɣurbiz 2019/2020. Ussan n usteɛfu n lexrif (imuras n 5 wussan), ad bdun seg uzekka, 29 tuber ar 3 unbir 2019. Imuras n 15 n wussan n tegrest, ad ilin seg wass n 19 duǧember 2019 ar 5 yennayer 2020, ma d ussan n usteɛfu n tefsut, ad ilin seg 19 meɣres ar 5 yebrir 2020. Ma d tuffɣa tunṣibt n yimuras n unebdu, ad bdun seg wass n 2 yulyu 2020. Maca deg wakud-a n yimuras, ma yella-d usiwel i uselmad neɣ i umaswaḍ sɣur tenmehla n usedwel i kra n tannant n usileɣ neɣ aseɣti n yikayaden, yewwi-d ad yili deg umkan di lawan, acku imuras n 15 n wussan deg usaḍuf ttunefken i unelmad akken ad yesteɛfu seg ɛeyyu n leqraya. Nessaram imuras igerrzen i yakk tawacult n usegmi.

Kh. A.

- PUBLICITÉ -