Accueil Tamazight Yecna Mennad seld lɣiba n 30 n yiseggasen

Montréal

Yecna Mennad seld lɣiba n 30 n yiseggasen

69

Yura deg usaru n tudert ad d-ilint tuɣalin n Mennad ɣer ccna, seld kraḍ-tmerwin n yiseggasen segmi iɣab, di temdint n Montréal, tamurt n Kanada. Aya, mi t-teɛreḍ ussan-a yezrin tddukkla Imdukkal n TQ5, i d-sekren kra n Yiqbaliyen deg yinig. D ayen i d-yewwin ayendin d tumert i wid iḥemmlen acennay-a, seg wakud amezwaru mi d-yeffeɣ yisalli n tuɣalin-is di Facebook.

Dɣa, ass n 8 yunyu yezrin, di tzeqqa i yeččuren d azayez, iban-d Mennad ihegga-as akken ilaq i temlilit iḍulen, mi yebda yesmektay-d tiqburin s taɣect-is taleqqaqt, yettarra-d ixemmimen ɣer zzman-nni ideg teǧǧuǧǧeg tezlit taqbaylit, nnernan daɣ yigrawen n ccna.

Ɣas yebɛed annect-nni d tallit ɣef usayes d usawaḍ, yessaweḍ Mennad iga-d yiwet n tegnit n tumert d yiḥulfan gar-as d wid i d-yusan ad as-slen, ad t-ẓren. Gar-asen dɣa, yewwi-d ayendin n tizlatin, yerna yesdukkel-d ula seg tid ideg yekki umaru Ɛmer Mezdad deg yimeslayen, am tezlit Tira.

Ɣas yettwassen Mennad s ccna kan, wanag yeǧǧa later-is ula deg usisleg (doublage) aqbayli. Akken i d-iberreḥ Racid At Ɛli Uqasi, d Mennad i yellan d anemhal n usenfar n usisleg n wunuɣ yettewliwilen Nello ɣer teqbaylit, i d-iɛeddan deg terga n BRTV tazwara n yiseggasen n 2000.

Seg wayen yecna Mennad deg sin n walbumen i d-yessuffeɣ, deg 1980 d 1983, ad d-nebder kan tizlatin Tira, Amedyaz, Ḥmed Umerri, Aẓeṭṭa, Tizizwit akked Imucaɣ. Ayen yerzan abeɛɛed-is seg usayes teɣzi n waṭas n yiseggasen, yenna-d Mennad deg yiwet n tdiwennit d akken icudd waya ɣer tulacit n umanajer ara d-yelhun d yiqeddicen-is n tẓuri imir-nni.

Ma ɣef tuɣalin-is ɣer unnar-a n ccna, iban-d ur tt-yefri ɛad akked rray-is ma ad ikemmel ad d-yettban neɣ uhu.
M. K.