Accueil Tamazight Yeffeɣ-d ass-nni n ssebt iɛeddan

Ccna - Album amaynut Neɣ ḍelmeɣ ! n Zedek Mouloud : Yeffeɣ-d ass-nni n ssebt iɛeddan

79
- PUBLICITÉ -

Ass-nni n ssebt, 23 deg unbir deg-i nella, i d-yeffeɣ, dagi deg tmurt akked Fransa, walbum amaynut n ucennay ameqqran Zedek Mouloud iwumi isemma Neɣ ḍelmeɣ ! Mbeɛd mi tettuwexxer tuffɣa n walbum-agi i ilaqen ad d-yeffeɣ deg waggur n yulyu yezrin, ha-t-an yewweḍ-d lawan-is i waggur-a n unbir 2019. Deg-s ad naf 14 n tezlatin i d-yettmeslayen ɣef waṭas n yisental i yuɣ tannumi ucennay aqbayi Zedek Mouloud yettawi-d awal fell-asen, yecban tutlayt, tamurt, tirrugza, tayemmat, tagmat d wayen-nniḍen : meḥsub ayen yakk i icudden ɣer tmetti s umata.

- PUBLICITÉ -

Deg tezlatin n tikkelt-a, u xas ulamma Zedek yeqqim d Zedek akken i yuɣen yid-s tannumi wid i as-isellen, meɛna yella-d umaynut deg useqdec n wallalen atraren deg uẓawan-is. Yedda uẓawan s wallalen n tallit-a, ur yeqqim ara kan deg ugambar-nni-ines. Aya, yefka udem atrar i ccna-s. I wakken yessaweḍ ɣer uswir-a deg useqqɛed n tezlatin seg tama n uẓawan, yessawel i wid teɛna temsal am Allaoua Bahlouli, Mokrane Adlani, Malik Kerrouche…atg.

Am wakken i d-yextar, diɣ, imẓawanen imeqqranen i yekkan deg leqdic-agi azeddgan. Seg tama n uɣanib, ad t-naf yedda deg ubrid n wayen akken i icennu yakan, xas ulamma yesnerna-as acemma deg tiwḍin-is ɣer tmeẓẓuɣt. Ahat, ad ilin wid ara as-yinin ibeddel ciṭ deg uẓawan, maca, mi ara tesleḍ i tɣessa n tezlit, ad tt-tafeḍ tennerna s tidet, acu kan ur tbeddel ara seg uẓar-is. Deg walbum-agi, nezmer ad d-nini belli yejmeɛ-d akk aɣanib n umecwa-is ɣer yiwen umekkan. “Yejmeɛ-itt-id am lḥenni”, akken qqaren. Seg tama n usefru, mazal-it yeqqaz irennu deg usekfel n wawalen iqdimen akked useqdec s tḥerci n wawalen atraren. Yeẓra amek u anda i d-yettaf awalen iqburen. Yessen amek ara ten-id-yessekfel mi ara yaf asentel i yeffɣen fell-as.

Tikkelt-a, yerza ɣer Ubrid aqdim i wakken ad t-id-yeglem u ad as-d-yesmekti ayendin n yiḥulfan n temẓi. Din i as-yeḥka tameḍrurt-is, s usḥissef, i ubrid-nni aqdim ladɣa imi i d-yemmekti tuɛciqt-is. Am wakken, diɣ, i d-yegmer kra n wawalen iqburen s usuzen deg tezlit “I mimmi”, ladɣa deg wayen yeɛnan tineqqisin-nni n zik i d-ssawalent temɣarin. Seg wayen yerzan awalen atraren, ad ten-naf keccmen-d sya ɣer da, anda kan wulmen, ladɣa deg tezlatin timḥaddiyin s umata. Seg tama n tnaṣlit akked yizamulen n trrugza ɣer yimaziɣen s umata, yefka-d agzul fell-asen deg tezlit iwumi isemma “D Yennayer”.

Ula d iẓawanen n tezlit-a, mgaraden: ttaken acbih n tamiwin-nsen. Ma seg tama n tezlit tamḥaddit “A yemma yemma’’, ad naf asteqsi-a, i d-yettuɣal kan ɣef teɣzi n usefru “Acu yuɣen tamurt-iw? Acku, ɣef wakken i t-id-yenna “Tesserxas deg warraw-is”. Am wakken, daɣen, “Ssnen abrid, xḍan-as”. I wigi yakk, yerra-asen-d s tezlit “Awer timlilit”, anda i d-yenna: “Zik, nettemlili-d ɣer ṣṣaḥ, d tinna i aɣ-yesddukkulen. Nettawi-tt-id am leslaḥ, nessergagay iɛdawen. Tura, nettemlili-d ɣer ccḍeḥ, ha-tt-an din a Muḥ Uḥsen. Win ur tɣaḍ Teqbaylit, awer timlilit”. Ha-tent-in tezlatin n walbum-agi: A yemma yemma, Awer timlilit, Awi-d ukan, Am yimeslab, Winna, Dda Lḥafiḍ, Ifuk uṣerbek, Abrid aqdim, I mimmi, Ɛzizu, Aḍu-nni, Tabaḥant-iw, Ad iniɣ, D Yennayer.

Hocine Moula

- PUBLICITÉ -