Seg tazwara n useggas amaynut i teqqim tɣiwant n Tezmalt mebla aselway. Ayagi imi aselway-is aqbuṛ Mass (Γ.R), yeǧǧa amḍiq-is deg taggara n useggas n 2019. Ad d-nesmekti d akken mačči d tikkelt tamezwarut i teḍṛa temsalt-a, imi d yiwen n usinaṛyu i yeḍṛan deg taggara n useggas n 2018. Dɣa, seld leḥṛis n kra n wid yessuturen ṛṛwah-is, aselway n tɣiwant n Tezmalt, yedda-asen di lebɣi, iεewwel ad yeḥbes axeddim-is. Lameεna imir-n, yuɣal yendem, ibeddel ṛṛay-is, imi llan wiyaḍ ssutren-as ad d-yuɣal.
Γef leḥsab n teɣbalut-nneɣ, tamentilt n ṛṛwaḥ-is aseggas-a, ur temgerrad ɣef tin n yilindi. Γas ma yella ɣef leḥsab-is netta, yeqqar d akken, d tamentilt i t-yeεnan netta. Seg tama-nniḍen, yekker umeslay gar yimezdaɣ ɣef win ara yawin amḍiq-is, ladɣa imi teqqim tɣiwant-nsen mebla aselway. Γef usentel-a, aṣaḍuf yeqqaṛ-d belli d win i d-yusan deffir-s deg umuɣ n tefranin ara yeṭṭfen amkan-is. Ihi d yiwet n tmeṭṭut i yesεan 32 n yiseggasen kan ara yilin d taselwayt n tɣiwant n Tezmalt. Lameεna imezdaɣ n tɣiwant n tezmalt, xelεen s yisalli-agi. Ladɣa imi leεmeṛ, tesselḥa tmeṭṭut taɣiwant-nsen. Ahat llan wid iwumu ur d-yehwi waya, acku deg tmetti, mazal-iten heqqṛen tameṭṭut. Γas ddeqs ur yenwi fell-as, Massa (B.S), ad teṭṭef amḍiq-is deg ussan i d-iteddun.
K. K.