Accueil Tamazight Yegla lɛid s snat n terwiḥin

Bgayet

Yegla lɛid s snat n terwiḥin

67

Iɛedda lɛid amecṭuḥ deg tegnatin igerrzen seg waṭas n tamiwin, cerhen yimdanen, steɛfan, mɣafaren yiqriben. Seg tama-nniḍen, ldint tḥuna d kra n tnessufar (pharmacies), llan wallalen n usiweḍ, ladɣa deg wass wis sin. Maca, tella-d yiwet n tneqqiḍt berriken i d-yettilin yal mi ara d-zzint tegnatin am ti. Tigi d tiwaɣiyin n ubrid i igellun s terwiḥin yal tikkelt, s waṭas n ssebbat.

Deg Bgayet, kraḍ n twaɣiyin i d-yellan deg wass amenzu n lɛid kan. Tamezwarut, tella-d deg wadeg iwumi ssawalen Ibarisen deg tama n Tuǧa, ɣef 13h30. Tella-d gar snat n tkeryas Mégane d Clio yemyeckaḍen, tessegra-d ṭam n yimejraḥ yenṭerren seg yiwet n twacult. Tawaɣit tis snat, teḍra-d s ufella n tqenṭert n rebɛa n yiberdan yemfaraqen (quatre chemins) deg temdint n Bgayet, ɣef 15h 23. D yiwen n umuṭu i d-nehren sin n yilmeẓyen i d-yeɣlin s ufella n tqenṭert-a, d ayen i yeǧǧan win akken i d-irekben deffir, ad yessuffeɣ tarwiḥt imiren ya. Akken daɣen i d-tella yiwet n twaɣit ɣef leǧwayeh n 15h 37 deg tama n Cap Carbone deg leɛli n Bgayet. D sin n watmaten i d-yeɣlin ɣef ucruf d akessar s wazal n 30 n lmitrat, yiwen yemmut deg wadeg, ma d gma-s wwin-t yiɣallen n uḥuddu aɣarim ɣer sbiṭar ad yettudawi. Ɣef waya, teggar-d tiɣri tenmehla n uḥuddu aɣarim n twilayt n Bgayet s nehhu ladɣa i yilmeẓyen ad zwiren leɛqel, akken ad neqsent twaɣiyin-a i yettaǧǧan ddeqs n twaculin di leḥzen d yimeṭṭi.
Kh. A.