Ssuffɣen-d Srabes n teywalt n Tenmehla n uḥuddu aɣarim n waɣir n Bgayet, yiwen n wulɣu ɣef yiwen n usehwu ineqqen i d-yeḍran ass n, 24 yunyu yezrin, akked kra n leḥsabat ɣef laksidat s umata.
Dɣa, ɣef wayen i d-wwin d isallen, kkren yimsellken n wadeg yettwarnan n Yilmaten, n Uferdis n Sidi Ɛic, akken ad rzun ɣer umḍiq ideg yeḍra yiwen n usehwu deg ubrid aɣelnaw wis 26, deg umkan iwumi ssawalen Rmila, taɣiwant d tdayra n Sidi Ɛic.
D yiwen n umyeẓdam i d-yellan gar tkerrust Hyundai Accent, i yeṭṭafaren tawilayt n 6, akked yiwen n umuṭu s yisem n Lifan. Ayen yesḥissifen d mi yegla usehwu-a s terwiḥt n unehhar n umuṭu, i yellan yesɛa 27 n yiseggasen di tudert-is. Ma yella d ameddakkel-is i tuɣ yettawi si deffir, bu 24 n yiseggasen, yuɣ-iten deg waṭas n yimeḍqan n tfekka-s. Yewwi-d ad d-nesmekti d akken ilemẓiyen-a llan ur xdimen iqelmunen n tɣellist ɣef yiqerra-nsen.
Daɣen, ula d sin n yiterrasen i tuɣ deg tkerrust Hyundai, uɣen-itent s kra n lejruḥ d lxelɛa. S wakka ihi, dima ɣef leḥsab n Uḥuddu aɣarim n Bgayet, yewweḍ umḍan n yisehwa segmi yebda useggas armi d 24 yunyu iɛeddan, ɣer 879, i d-igan 1 066 n yimejraḥ, nɣan 22 n yimdanen. Yettales-d awal Uḥuddu aɣarim ɣef wazal n uḥader deg yiberdan d uqader n wangal n ubrid.
M. K.