Accueil Tamazight Yegla usehwu s yiwen n yilemẓi

Tizi n Berber

Yegla usehwu s yiwen n yilemẓi

38

Ulamma d isehwa n ubrid iwumi nsell s waṭas gellun s tudert n yinehharen, seg tikkelt ɣer tayeḍ, acu kan ula d isehwa n uxeddim, ttawin tirwiḥin di tegnatin tuḥzinin.

Dɣa, yeḍra-d ass n, 5 ɣuct yezrin, yiwen n usehwu ineqqen di taddart n Ayt Buɛisi, taɣiwant n Tizi n Berber, i ibeɛden s wazal n 35 n yikilumiṭren ɣef wul n twilayt n Bgayet. Yella-d yir uneḍruy-a mettwal 14:00 n tmeddit, deg ubrid yettawin i temnaḍt n Ugni n Tmara, mi yegrarreb unehhar n yiwen n ukerrus deg yiwen n ucruf amihan. Anehhar-a yella yeṭṭafar tarmist i yeṭṭfen lecɣal n usiweḍ n internet i kra n tamiwin n tɣiwant-a. Ɣef wakken i d-ddan yisallen n teɣbalut-nneɣ, i iqerben nezzeh i lecɣal-a yettmaggan deg Ayt Buɛisi, mi d-iɛedda unehhar n ukerrus n uɛrak n ubiṭun seg yiwet n ṭṭurna i d-nnan tewɛer, yerwel-as lmizan, send ad yerr ɣer rrif n ubrid ad yegrireb seg ucrif.

Tiyita tameqqrant n uɣelluy tenɣa dindin ilemẓi-nni anehhar, i yellan yesɛa 25 n yiseggasen deg yixef-is, i d-yerzan seg temnaḍt n Buɛendas. Mi asen-yewweḍ yisalli, ḥeḍren-d yirgazen n Uḥuddu aɣarim d ssrabes n yiǧadarmiyen, snesren-d asfel-nni war iman, s tallelt n yiqeddacen n tɣiwant n Tizi n Berber.

Ayen i d-iḍefren syin akkin d asiweḍ n lǧessa-nni ɣer texxamt n yimattanen n sbiṭar n Uweqqas. Ad d-nesmekti d akken tewwi-d tedyant-a ayendin d asḥissef i wulawen n yimdanen, ama d imezdaɣ n tɣiwant n Tizi n Berber neɣ d iberraniyen i d-yesbeggnen leḥzen-nsen, abeɛda deg yiẓeḍwan inmettiyen. « Llan teddun yiqeddicen akken ilaq, war lhul neɣ d laksida, syinna yusa-d ubaxix-a ad yeglu s terwiḥt n yilemẓi-a. Ad fell-as talwit », i d-yenna yiwen n urgaz.
M. K.