Accueil Tamazight Yeldi ustudyu d amaynut

Aweqqas : Yeldi ustudyu d amaynut

33
- PUBLICITÉ -

D ayen ara d-yawin akemmic n tumert i yicennayen d yinaẓuren n temnaḍt n usamar n Bgayet s umata, seg Ticci d Uweqqas armi d Ayt Smaɛel d Xerraṭa. Ussan-a ihi i yeldi ustudyu n usekles amaynut di tlemmast n Uweqqas, meqrub axxam n tɣiwant, s yisem n « New Harmony », neɣ « Imesli Amaynu ». Ɣef wakken i d-nnan kra n yicennayen akked bab n ustudyu s timmad-is, ad yili ustudyu-a d amenzu am win deg temnaḍt n Uweqqas d yakk asamar n Bgayet, rnu d awḥid daɣen din akka tura, imi uqan ayendin yistudyuten di Bgayet merra-is. Daymi sya d tasawent, wid akk i d-yessuffuɣen iḍebsiyen n ccna di tama-a n Bgayet, neɣ i yesseklasen isefra-nsen, sɛan tagnit akken ur ɣɣaden iberdan am zik ɣer tansiwin ibeɛden, am temdint n Bgayet d Tizi Uzzu. Abeɛda ma yella ur d-yettekkar ustudyu-a s waṭas i yimsaɣen si tama n tedrimt, rnu ad yesɛu ayen akk i d-yessutur d allalen yelhan ustudyu atrar di tallit-a ideg nella.

- PUBLICITÉ -

« D ayen igerrzen maḍi ma yella ad nesɛu ula d nekni di tama-nneɣ astudyu n usekles. Acku aṭas i sɛeddayen yinaẓuren-nneɣ akken ad siwḍen ad afen astudyu n usekles bac ad d-slalen amaynut-nsen n ccna ɣer ulzuz. D acu kan, yewwi-d ad d-nebder taluft n uxelles d ttawilat n tedrimt n yicennayen-nneɣ i yettraǧun ad ilint sswami xir n yistudyuten-nniḍen, neɣ xersum d yiwet-nsent », i aɣ-d-yenna yiwen n umezdaɣ n usamar n Bgayet. Ad d-nesmekti d akken yella ustudyu-a di taddart n Amizur, maca imi tuget n yikelyanen-is seg usamar n Bgayet, yefren bab-is ad yaẓ ɣer Uweqqas. Deg-s ad yessishel taluft i wid ukkud iqeddec, deg-s ad d-yerbeḥ amḍiq asetratiji deg Uweqqas n teftisin d tmerrit.

M. K.

- PUBLICITÉ -