Ayeni d-yeskan ayen belli tamnaḍt n At Smaεel, tetteddu ɣer sdat segyal tama, d iqeddicen n warraw-is iyezgan ttḥebbiṛen ɣef wadegansa ara d-agmen tamussni. Amedya d Massa Karima Idir, tameṭṭut n Meǧǧuǧ, iyeṛẓan azaglu tikkelt-a s tikti ara d-yawin aṭas n ubaɣur i wat taddart, ladɣa ilemẓiyen deg-sen.
Ayagi, imi d-tesnulfa aɣerbaz n usileɣ deg tutlayin, am tutlayt-nneɣ tagejdant taqbaylit, tarumit, taεṛabt akk ed teglizit. Rnu iwaya, tenwa ad texdem ula d asileɣ deg tsenselkimt. Deg udew enni i d-newwi akked Massa Karima, tenna-d belli d iseɣ d ameqqṛan inettat imi teldi aɣerbaz-a n usileɣ, acku d amezwaru deg taddart n Udrar n Fad.
Terna temmeslay-aɣ-d ɣef usirem ageεmir itesεa d akken aɣerbaz-a, aṭas ara d-yernu iterwa n At Smaεel s umata. Acku am nettat, am wid iqeddcen yid-s, ad xeddmen ugar n wayen iwum uzemren iwakken adfken afus n tallelt iwid yettnadin tamussni, ama d wid yeqqaṛen deg uɣerbaz amenzu, alemmas, neɣ deg tesnawit. Massa Meǧǧuǧ, deg wawal-is, twekked-aɣ-d belli, xas ma yella s ciṭṭuḥ n ttawilat ara bdun, meεna tebɣest-nsen tugar iεewwiqen ara d-mmagren.
Ma yella ɣef yisragen n tneldayt, ad yeldi deg wussan n dduṛt akkit, imi ad faṛsen ula d ussan n taggara n ddurt, acku d wigad i d ussan n usteεfu n y inelmaden. Seg tama tayeḍ, tberreḥ-aɣ-d ula ɣef ssuma n temsirin I yettruḥun seg 600 armi d 800 n yidinaṛen. Di taggara, yewwi-d ad nessebɣes tiktiwin-a igerrzen, ladɣa tikci n wazal itutlayt taqbaylit.
Dɣa terna-aɣ-d Massa Meǧǧuǧ: «D tidet ur aɣ-tennufkara tegnit iwakken adnɣer tamaziɣt deg tallit-nneɣ, meεna nekk ass-a εewwleɣ-d ad iliɣ gar yinelmaden n tmaziɣt deg uɣerbaz-a, acku bɣiɣ ad issineɣ tutlayt n yemma d baba. Tanemmirt i Uɣmis n Yimaziɣen i d-yerzan daɣen». I wugar n yisallen, tzemrem ad tessiwlem iwuṭṭun-a 07 75 97 67 36, neɣ ad taznem iznan-nwen ɣer tansa lteschool_eng@gmail. com. neɣ ɣer usebter-nsen Facebook: LTESchool06.
K. K.