Accueil Tamazight Yella-d s wudem unṣib seg 48 n lwilayat

Asfugel n yennayer : Yella-d s wudem unṣib seg 48 n lwilayat

335
- PUBLICITÉ -

D tikkelt tis snat ara tesfugel tmurt n Lezzayer yennayer s wudem unṣib. Aya, yeḍra-d imi yuɣal wass-agi amezwaru n useggas n yimaziɣen d lficṭa taɣelnawt u yettwaneṣseb deg tmendawt tazzayrit.

- PUBLICITÉ -

Asfugel-is, iban-d, dɣa, s waṭas deg yiɣerbazen n Lezzayer merra imi taneɣlaft n usedwel, Massa Benghebrit, tefka iwellihen i yinemhalen n ttrenbga n 48 n lwilayat i wakken ad sfuglen yennayer deg yal aɣerbaz n tmurt. Ula d nettat s timmad-is, teḥder i yiwet n tfaska n yennayer deg yiwen uɣerbaz n tmanaɣt anda i xedmen yinelmaden kra yirmuden idelsanen i yesɛan assaɣ akked umenzu n yennayer. Ɣef wakken i d-tenna tneɣlaft n usedwel, qqaren tamaziɣt deg 44 n lwilayat. D tikkelt, diɣ, tamezwarut ara d-tili temlilit tagraɣlant ɣef yennayer deg tmurt n Lezzayer.

Yeḍra usihar-agi deg lwilaya n Bgayet anda i d-tettwahegga temlilit tagraɣlant s usentel « Yennayer, amezruy d tgemmi » anda ḥeḍren aṭas n yimussnawen akked yimnuda i d-yusan seg Merruk, Tunes, Libya, Mali, Burkina Faso, Sinigal,…atg. Yella-d wahil d amerkati, itezzi gar yisaragen, timsikniyin akked leqdicat idelsanen-nniḍen. Ma d Aseqqamu unnig n timmuzɣa, yextar, aseggas-a, ad yesfugel yennayer deg lwilaya n Leɣwaṭ. Deg temdint-a i d-yella, ihi, usfugel-is s wudem unṣib. Asfugel i d-yeḍran ula s lǧiha n teɣlift n yidles imi heggan-d u ḥeḍren akk timeɣriwin tunṣibin i d-yettwaheggan ɣef yennayer deg yal lwilayat. Deg Tizi Uzzu, yella-d usfugel n yennayer s teɣzi n ddurt, seg 07 ar 13 deg yennayer 2018 deg waṭas n yimekwan n lwilaya, ama deg Uxxam n yidles Mulud Mɛemmeri, deg tneḍfar-is n Yiɛezzugen neɣ deg temkerḍit n tɣiwant n Tizi Uzzu d wanda-nniḍen.

Am wakken i d-yella, ɣef demma n waya, ssuq n yennayer deg umraḥ n usalay n temdint n Tizi Uzzu. Ad naf deg-s talext, lfeṭṭa, tamemt, zzit, aẓeṭṭa,…atg. Ma deg Uxxam Mulud Mɛemmri, yezzi leqdic s umata ɣef tgemmi akked yidles s tmeskiniyin akked yisaragen i gan yimsuddsen d tajmilt i uselmad Mohand Akli Haddadou i yemmut ussan-agi kan iɛeddan. Yella-d, dɣa, yiwen wass n tezrawt yeɛnan aselmad-agi n tesdawit n Tizi Uzzu. Deg usarag i d-wwin kra n yiselmaden isdawanen, rran tajmilt i umeɣnas-agi n tmaziɣt u mmeslayen-d s telqayt ɣef yimahilen-is, ladɣa, aḥric-agi n umawal iwumi yefka azal ameqqran deg umahil-ines. Amwakken i d-tella, diɣ, tfaska n Ayrad deg tlemmast n temdint n Tizi Uzzu, ass-nni amezwaru n usfugel.

Hocine Moula

- PUBLICITÉ -