Accueil Tamazight Yella-d usfugel-is deg yal tama n Tmurt

AMENZU N YENNAYER - Ixf n useggas ɣer yimaziɣen

Yella-d usfugel-is deg yal tama n Tmurt

123

Am yal aseggas, ttqabalent Yimaziɣen amenzu n Yennayer s lferḥ d ameqqṛan. Ama deg yixxamen, deg tddukkliwin neɣ deg yiɣerbazen. Yennayer, yuɣal d ansay, neɣ d azamul ɣlayen deg tudert n yal Amaziɣ. Daymi i sfuggulen amenzu n Yennayer neɣ taggurt n useggas amaynut n Yimaziɣen. Aseggas-a, yella-d usfugel unṣib sɣur Aseqqamu unnig n timmuzɣa deg lwilaya n Tipaza. Am awkken i t-sfuglen deg aɣerbaz n tmurt n Lezzayer. D tidet, amur ageɛmir n yimaziɣen, ẓṛan d acu-t yennayer, meεna llan wid ur nezṛi s umezruy-is.

Ttwalin-t kan d ttiεad i tuččit, d ccna d ccḍeḥ. Am warrac imecṭaḥ, imi azgen deg-sen, ad ten-tesseqṣiḍ d acu-t yennayer, ad ak-d-rren d aseggas amaynut kan. Γef waya, i εemmden yimḍebbṛen n uɣerbaz amenzu n At Saci, di tecwawt-nsen, tanemhalt-is Massa ( L.Ǧ ), ad tili tmeɣṛa n usfuggel n yennayer n tikkelt-a, d tamsirt ɣef yennayer d umezruy-is, uqbel ad tili d tameɣṛa i lmakla d ccna. Deg temsirt-a, tessegza-d yiwet n tselmadt i warrac, belli yennayer d ayyur amenzu n useggas n Yimaziɣen kan. Terna temlay-asen-d belli d Imaziɣen i d agdud amezwaru di ddunit.

Ma yella ɣef leḥsab n yimaziɣen ayweq i yebda, tenna-asen belli yebda segmi i yesseɣleb ugellid Cacnaq ɣef uferεun i yellan yeḥkem tamurt n Maṣeṛ. Ayen i yesswehmen arrac ugar, imi i asen-tenna belli nugar lejnas-nniḍen s 950 n yiseggasen. Imir-n bdan ttṣerfiqen, ttεeggiḍen Anwi wigi? D Imaziɣen! Am wakken, i asen-temmeslay ɣef wansayen-nsen deg umenzu n yennayer. Dɣa tefka tagnit imir-n i warrac, i wakken ad d-inin ayen i ssnen ɣef umenzu n Yennayer. Dinna i d-iban zzux i kesben warrac imecṭaḥ deg wulawen-nsen, imi d Imaziɣen i llan. Seld tamsirt-a i ten-ineffεen aṭaṣ, kecmen warrac ɣer tzeqqa anda i tres tuččit i d-wwin nutni d yimawlan-nsen.

Yal ṣṣenf yella, ama d tiɣrifin, berkukes, ameqful neɣ d lesfenj. Ula d seksu n ubiṣaṛ, d win n uyaẓiḍ, llan di ttiεad. Aredmani, ččan warrac, zdin gar-asen d yiselmaden, d yimawlan n warrac, taswiεt n taḍṣa d ucmummeḥ. Imi ssulin lmakla, fkan-as i usefru azal-is, dɣa ddeqs n yinelmaden i d-yewwin isefra ɣef Yennayer. Syin akkin, yeggeḍ-d lawan n ccdiḥ, yerna d yiwen n uqcic i d-yewwin ṭṭbel, yettḍebbil akken ilaq. Ineglusen imecṭaḥ, yehwa-asen wannect-nni nezzeh. Ayagi yettban-d, deg teḍṣa i yugin ad yexḍu icenfiren-nsen.

Di taggara, nefka awal i yiwet n teqcict, dɣa tenna-aɣ-d: « ttzuxxuɣ imi d Tamaziɣt i lliɣ, ssarameɣ aseggas ameggaz i yimaziɣen anda ma llan». Ula d nukni seg tama-nneɣ, ad awen-d-nini aseggas ameggaz, d win ara awen-d-yawin talwit d tezmert, d wayen lεali.

K. K.