I lmend n wass aɣelnaw n yimeɛder, i d-yettuɣalen yal 14 meɣres n yal aseggas, tiddukkla tanaddalt “Hndi Sport Kabyle”n lwilaya n Tizi Uzzu, thegga-d yiwen n leqdic s wazal-is deg Wammas n zzhu ussnaw (CLS) n temdint n Tizi Uzzu. Ulamma melmi kan i bdan yiɛeggalen n tddukkla leqdic deg unnar, maca ssawḍen ad suddsen yiwen wahil d amerkanti i lfayda n warrac imecṭaḥ meɛduren, imi d tabɣest d lebɣi akked leḥrara n uxeddim i ten-yeǧǧan ad gren isurifen ɣer sdat, xas s lqella n wallalen. Yella-d leqdic-agi ɣef teɣzi n wass-nni n lexmis 14 meɣres 2019, i yebdan lewhi n 10h00 n ssbeḥ s waṭas n temsikniyin ɣef waṭas n yisental yemgaraden.
Am wakken daɣen i fkan tagnit i yigerdan imeɛdar i wakken ad uraren s waṭas n wuraren i d-asen-d-wwin yiɛeggalen n tddukkla-agi. Syin akkin, tella-d turart n yiwet n tmezgunt i warrac, tin ɣur-s, tella-d tukci n waṭas n warrazen d wuraren i warrac-agi imecṭah i d-yerzan ɣer leqdic-agi. Mi yezgen wass, yella-d ttiɛad n temlilit akked lwali n Tizi Uzzu Mass Abdelhakim Chater, anda fuṛsen tagnit yiɛeggalen n tddukkla-agi tanaddalt “Hndi Sport Kabyle” mmeslayen-d ɣef lexsasat i d-ttmagaren deg unnar.
Ma d lwali si tama-s, iṛeggem-asen ad d-yefk afus n tallelt d ibeddi-ines ugar ɣer yidis n yimdanen-agi meɛduren. Yessulli leqdic-agi, s yiwet n tegnit n leferḥ akked tumert, ama si tama n yimsuddsen-agi neɣ si tama n yigerdan i d-yerzan ɣer dinna. Yella-d diɣ ufraq n yikersiwen yettḥariken i lfayda n yigerdan imeɛduren di tikli.
Ad nesmekti kan belli, tiddukkla-agi, txeddem leqdicat-nniḍen ɣef teɣzi n useggas, gar-asen turart n waṭas n leṣnaf n waddal i tturaren yimeɛdar, yal taggayt s waddal i d as-iwulmen. Ɣer taggara, nessaram-as i Tddukkla-agi amecwar ɣezzifen d tiddin ɣer sdat deg uxeddim-nsen.
Adaoun Abdelghani