Accueil Tamazight Yella-d wass wis sin n usileɣ i 164 n yimekkiyen

TIZI UZZU - Timsizzelt Imura n tmurt-iw

Yella-d wass wis sin n usileɣ i 164 n yimekkiyen

45

Mbeɛd mi i d-tuɣal temsizzelt n tira Imura n tmurt-iw deg tezrigt-is tis snat, yebdan deg wussan iɛeddan. Yella-d ufran n yinelmaden ara igensen ladayrat-nsen (asunen) deg lwilaya n Tizi Uzzu, s temsizzelt tamenzut i d-yellan deg yiɣerbazen deg wussan yezrin. Tura, mi yessuli umecwar amezwaru n temsizzelt-agi n tira, ttwafernen-d wazal n 164 n yinelmaden ara imetlen asunen-nsen deg temsizzelt i d-iteddun. Ass-nni n ttlata 16 yebrir 2019, i d-yella wass wis sin n usileɣ i lfayda n yinelmaden-agi n tlata n yiswiren n usegmi. Iɛedda wass-agi wis sin n usileɣ, i d-yellan deg tesnawit n ɛebban Remḍan n temdint n Tizi Uzzu deg tegnatin igerrzen.

Iswi n temlilit-agi n uwelleh d akemmel n wahil n usileɣ n yinelmaden i d-yufraren deg umecwar amezwaru n temsizzelt-agi Imura n tmurt-iw. Mbeɛd mi d-yella wass n usileɣ amezwaru ass n larebɛa 20 meɣres 2019, ideg i d-tella temlilit tusridt gar yimura n uzekka akked yimaswaḍen d yimura n lwilaya n Tizi Uzzu. Yal aswir s yimsilɣen-is; aɣerbaz amenzu yesɛa imaswaḍen d yimura n tlata n tutlayin-agi: tamaziɣt, tafransist akked taɛrabt. Ma d aɣerbaz alemmas akked tesnawit, llan diɣ yimsilɣen n tutlayt taglizit, i d-yernan aseggas-a. Ɣef teɣzi n tsebḥit n wass, yella-d uwlleh d usileɣ n yimekkiyen-agi, yal agraw s tutlayt-is d uswir-is. Imaswaḍen si tama-nsen, mmeslayen ugar ɣef tɣessa akked talɣa n uḍris, ma d imura meslayen ɣef tirmit-nsen deg tira, d wamek i ilaq ad naru aḍris aseklan.

Ma di tmeddit n wass, tella-d tegnit n tira, anda yal anelmad ad yaru aḍris ɣef usentel i d as-yehwan. Yetturaǧu ad yili wass wis sin n usileɣ deffir kan n yimuras-agi n tefsut uqbel timsizzelt tis snat ara d-yilin ass n 23 yebrir 2019. Wid ara d-yifriren deg umecwar-agi wis sin d nutni ara igensen lwilaya n Tizi Uzzu deg temsizzelt n temnaḍin, i yetturaǧun ad tili di Blida deg waggur i d-iteddun.

Timsizzelt n lwilaya azekka n ttlata

Azekka n ttlata, 23 yebrir 2019, ara d-tili temsizzelt n lwilaya deg wakal n tmurt merra. Yal lwilaya ad d-sifrer imekkayen ara tt-igensen deg temsizzelt n temnaḍin syin akkin di tɣelnawt. Dagi di lwilaya n Tizi Uzzu, yetturaǧu ad tili temsizwert-a deg tesnawit Ɛebban Remḍan n temdint n Tizi Uzzu. Ad ttekkin deg-s wazal n 164 n yinelmaden, i d-yekkan seg 6 n yiɣerbazen imenza d 8 n yiɣerbazen ilemmasen akked 8 n tesnawiyin (sin n yinelmaden i yal tutlayt). Ufaren-d deg umecwar amezwaru 48 n yinelmaden deg uɣerbaz amenzu, 87 deg uɣerbaz alemmas akked 29 deg tesnawit. Yetturaǧu seg temsizwert-agi n uzekka n ttlata, ad d-ifriren yinelmaden ara imetlen lwilaya n Tizi Uzzu deg umecwar wis kraḍ n temsizzelt-a.Ɣer taggara n temlilit-agi, ismekta-d Mass Ali Ḥmed Muḥend, ɣef tḥawact n useggas iɛeddan. Anda i d-yenna-d belli : “Aseggas iɛeddan, lwilaya n Tizi Uzzu, tufrar-d s rebɛa n yimura, snat n uɣerbaz amenzu, yiwet deg uɣerbaz alemmas akked yiwen deg tesnawit”.

Ikemmel yenna-d umselɣu-nneɣ: “Ass-nni ttlata 16 yebrir, i dufraren sin yinelmaden-nniḍen deg temsizzelt taɣelnawt n tira n yiznan i warrac, deg tezrigt n 2019”. Ɣer taggara, ad d-nesmekti belli, timsizzelt-agi “Imura n tmurt-iw” deg tezrigt-is tis snat, yessuddes-itt-id uɣlif n usegmi d uselmed akked win n yidles. D timsizzelt taɣelnawt s rebɛa n tutlayin, yettwaslemden deg uɣerbaz azzayri, yellin tiwwura-s i yinelmaden iɣurbizen yesɛan tanfalit igerrzen di kra tutlayt. Yetturaǧu, ad tili temsizwet n taggara, ideg ara d-fernen inelmaden ara yawin arazzen, yerna ad yessisreg uɣlif n usedwel d usegmi, imuhal-agi-nsen yerna ad ttekkin deg rreḥba tagraɣlant n udlis di tmurt n Lezzayer (SILA) 2019.

Adaoun Abdelghani