Accueil Tamazight Yemmut yiwen n unelmad deg uɣerbaz

Buεendas

Yemmut yiwen n unelmad deg uɣerbaz

104

Kkren-d yimezdaɣ n tɣiwant n Buεendas ass n, 6 tubeṛ yezrin, ɣef ṣṣuṭ n leεyaḍ d yimeṭṭawen n warrac d yimawlan-nsen. Ayagi imi i d-yeɣli yiwen n uɣlad (taɣrabt) deg uɣerbaz alemmas n  » Ali Zermani « , i d-yezgan di tɣiwant n Buεendas, tadayṛa n Sṭif. Γef leḥsab n yisallen i aɣ-d-yewwḍen, axeṣṣaṛ-a i yeḍṛan deg texxamin n ubduz, yegla s terwiḥt n yiwen n unelmad iwumi qqaṛen (B. Ɛ.), ma yella d inelmaden-nniḍen i yellan deg wadeg-nni imir-n, jerḥen, yerna addad-nsen mačči d win yeṣṣefṛaḥen. Ineggura-a, ttwawin s uɣiwel i teklinikt n Buεendas. Ad d-nesmekti d akken ula d taklinikt-a, hrurin leḥyuḍ-is, dɣa ula d nettat seg teswiεt ɣer tayeḍ, zemren ad d-ɣlin, ladɣa imi lebni-is d aqbuṛ nezzeh.

Seg tama n yimezdaɣ, irkeb-iten zzεaf d ameqqṛan, imi ayen yeḍṛan d lemri ɣef waddad n tɣiwant n Buεendas i yuɣalen di rrif seg yal tama. Ula d aselḥu n tlufa deg-s, ur yewqim ara. Ayagi imi imasayen n uɣerbaz-a alemmas, ṣṣawḍen-asen i yimḍebbṛen n tɣiwant isallen ɣef umahi ideg ttidiren warrac deg uɣerbaz-a. Yerna mačči d aɣlad-nni i d-yeɣlin i yehṛuran kan, ula d yiwen-nniḍen seg wid i d-yezzin i tesnawit, ur yettεeṭṭil ara ad d-yernu iɣer gma-s. Meḥsub nezmer ad d-nini, amahi yezzi-asen i yinelmaden, nutni zgan-d di tlemmast. War ma yesseḥseb yiwen i wayen i izemren ad yeḍṛu. Asteqsi-nneɣ ass-a, d anwa i ilaq ad sḍelmen ? D anemhal i yeǧǧan arrac tezzin ɣer umkan-nni, ur nesεi taɣellist, neɣ d ibabaten n warrac i yestehzan, ssusmen ɣef wayen iḍuṛṛen i dderya-nsen? Neɣ d tamurt i yefkan azal i wayen ur neswi, ma d arraw-is swan seg yidammen-nsen?. Yal yiwen itekka deg txeṣṣaṛṭ-a, lameεna lemḍeṛṛa-s d ineglusen i tt-ixellṣen.

K. K.